: गोरखाको चुमनुब्री- १ स्थित पाङबारी हिमालमा पाँचदिनदेखि बेपत्ता दुई इटालियन नागरिकको पाँच दिनपछि शव फेला परेको छ । मंगलबार पाङबारी हिमालको पहिलो शिविरमा इटालीका ६७ वर्षीय स्तेफानो फरिनातो र ३७ वर्षीय अलेस्सान्द्रो गापुटोको शव फेला परेको जिल्ला प्रहरी कार्यालय गोरखाले जनाएको छ ।
उनीहरू हिउँले पुरिएको अवस्थामा फेला परेको जिल्ला प्रहरी कार्यालय गोरखाको सूचना अधिकारी डीएसपी राजकुमार श्रेष्ठले बताए । मृतक आरोहीहरूको शव हेलीमार्फत् सामागाउँ ल्याइ राखिएको श्रेष्ठले बताए ।
७००५ मिटर अग्लो पाङबारी हिमालबाट फर्कने क्रममा तीन इटालियन र एक नेपाली सहयोगी गत हप्ताको बुधबारदेखि पहिलो शिविर र आधार शिविरमा अलपत्र परेका थिए ।
इटालीका ६५ वर्षीय भेल्टर पेरलिनो आधार शिविरमा र ६७ वर्षीय स्तेफानो फरीनातो र ३७ वर्षीय अलेस्सान्द्रो गापुटो सो हिमालको पहिलो शिविरमा फसेको प्रहरीको भनाइ छ । हिमाल आरोहण गर्न नसकी फर्कने क्रममा हिमपातले बाटो अवरुद्ध भएर उनीहरू फसेका थिए ।
५००० मिटर उचाइमा अवस्थित पाङबारी हिमालको बेसक्याम्पमा फसेका ६५ वर्षका भेल्टर परलिनोको भने आइतबार बिहान १० बजे हेलिकोप्टरबाट उद्धार गरिएको थियो । उनको साथमा बेसक्याम्पमा रहेका पेम्बा रेञ्जी शेर्पा, दावा छिरी शेर्पा र पासाङ तामाङको पनि हेलिकोप्टरबाट उद्धार गरी उपचारका काठमाडौं पठाएको प्रहरीको भनाइ छ ।
