: नवलपरासी सुनवल नगरपालिका–१३ घ्यूडल्लाका ६२ वर्षीय एक वृद्धले श्रीमतीको हत्या गरेका छन् । सामान्य मनमुटावका कारण खडकबहादुर थापाले ५५ वर्षीय श्रीमती भिमकला थापाको खुर्पा (हसिया) प्रहार गरेर हत्या गरेको प्रहरीले जनाएको छ ।
मंगलबार बिहान घर नजिकै छिमेकीको घरमा तरकारी बनाउनका लागि टमाटर माग्न पुगेकी श्रीमतीलाई फर्किने क्रममा थापाले खुर्पा प्रहार गरी हत्या गरेको जिल्ला प्रहरी कार्यालयका सूचना अधिकारी डिएसपी विरदत्त पन्तले जानकारी दिए । श्रीमती बाहिर निस्केको देखेपछि खुर्पा लिएर निस्केका थापाले छिमेकीकै घर अगाडि हत्या गरेका हुन् । खुर्पा प्रहारबाट गर्धन, ढाँड र खुट्टामा चोट लागेपछि उपचारका लागि बुटवल सिटी अस्पतालमा पठाइएकोमा उनको मृत्यु भएको प्रहरीले जनाएको छ ।
अभियुक्त थापा ३४ वर्षदेखि भारतमा काम गर्दै आएका थिए । बाग्लुङ्ग घर भएका थापा तीन वर्षअघि भारतबाट आएर त्यहाँ स्थायी बसोबास गर्दै आएका हुन् । अघिल्लो दिन पारिवारिक मनमुटाव भएको प्रहरीले जनाएको छ । ‘हत्या नै गर्नुपर्ने कारण के थियो भन्ने विषयमा अनुसन्धान भइरहेको छ । थप विषय पछि आउला’डिएसपी पन्तले भने ।
थापाका दुई श्रीमतीबाट ६ सन्तान छन् । हत्या गरेकी श्रीमती कान्छी हुन् । कान्छीतर्फ २ छोरा र २ छोरी छन् । दुवै जना छोरा विदेश छन् । एक छोरीको विवाह भइसकेको छ भने अर्की छोरी घरमै छन् । जेठीतर्फ छोरा छोरी गरी २ सन्तान छन् । जेठी श्रीमती लामो समयदेखि सम्पर्कमा नरहेको बताइएको छ ।
