: आइसीसी विश्वकप लिग २ अन्र्गतको अन्तिम खेलमा नेपाल यूएईसँग ४ विकेटले पराजित भएको छ। यो हारसँगै नेपालले यो शृङ्खला जितविहीन हुँदै सकेको छ।
दुबईको आइसीसी एकेडेमीमा टस हारेर ब्याटिङ गरेको नेपालले निर्धारित ५० ओभरमा ९ विकेट गुमाउँदै २३९ रन बनाएको थियो। नेपालले दिएको २४० रनको विजयी लक्ष्य पछ्याएको यूएईले ४९.१ ओभरमा ६ विकेट गुमाउँदै २४३ रनसहित लक्ष्य पूरा गरेको हो।
यूएईका लागि चौथो विकेटका लागि मोहम्मद वसिम र मुहम्मद सहदादले १४७ रनको सतकीय साझेदारी गर्दै यूएईको लागि जितको आधार बनाएका थिए।
यूएईका लागि मुहम्मद सहदादले सर्वाधिक ९६ रनको पारी खेले। उनले १२३ बलमा ६ चौका र ३ छक्का प्रहार गरे।
ओपनर तथा कप्तान अलिशान सराफू १८ रनमा पेभेलियन फर्किदा मुहम्मद सहदादले क्रिज सम्हाल्दै यूएईको लागि उत्कृष्ट पारी खेले। उनलाई साथि दिएका मोहम्मद वसिमले ७३ बलमा ४ चौका र ३ छक्कासहित ७६ रन बनाए। जहिद अलि ५ र ध्रुव परासर २ रनमा अविजित रहे।
नेपालका लागि करण केसीले ३ विकेट लिँदा, नन्दन यादव, ललित राजवंशी र सन्दीप लामिछानेले १–१ विकेट लिए।
त्यसअघि, ब्याटिङ गरेको नेपालको लागि भीम सार्कीले सर्वाधिक ४८ रन बनाए। उनले ६८ बलमा ४ चौका प्रहार गरे।
ओपनर कुशल भुर्तेल १.५ ओभरमा २ रनमा विकेट किपरको हातमा क्याच हुँदा नेपालका लागि भीम सार्की र आसिफ शेखले निकै सम्हालिएर खेलेका थिए। यी दुई ब्याटरले दोस्रो विकेटका लागि ७४ रनको साझेदारी गरेका थिए। १७.४ ओभरमा आसिफ शेख ३४ रन बनाउँदै रन आउट भए। यसपछि भने नेपालले ब्याटिङको मोमेन्टम खलबलिएको थियो।
चौथो क्रममा आएका कप्तान रोहित पौडेल २ रन बनाउँदै पेभेलियन फर्किए। त्यसपछि पाँचौँ विकेटको लागि दीपेन्द्र सिंह ऐरीले आरिफ शेखसँग ४९ रनको साझेदारी गरे। दीपेन्द्र सिंह ऐरीले ३७ रन बनाउँदै रनआउट भए।
आरिफ शेखले ३० रन बनाए। कुशल मल्लले आवश्यक परेको बेला टिमलाई एक इन्डबाट सम्हाल्दै ४५ रन बनाए। उनले नवौं विकेटको लागि सन्दीप लामिछानेसँग ४२ रनको साझेदारी गर्दै ४९.५ ओभरमा बोल्ड भए। अन्तिम विकेटको रूपमा क्रिजमा आएका ललित राजवंशीले अन्तिम बलमा चौका हान्दै अविजित रहे। उनीसँगै सन्दीप लामिछाने १५ रनमा अविजित रहे।
यूएईका लागि बलिङतर्फ जुनैद सिद्धकी, ध्रुव परासर र मुहम्मद जवादुल्लाहले समान २–२ विकेट लिए। जाहिद अलिले १ विकेट लिए।
नेपालले यस अघिको लगातार ३ खेल हारेको थियो। पहिलो खेलमा नेपालले अमेरिकासँग १०६ रनले पराजित भएको थियो। दोस्रो खेलमा यूएईसँग ५ विकेट र तेस्रो खेलमा अमेरिकासँग ४ विकेटले पराजित भएको थियो।
