— अमेरिकामा ५ हजारभन्दा धेरै उडान प्रभावित भएका छन् । सटडाउनका कारण एयर ट्राफिक कम गर्न उडान कटौती गरिएको पहिलो दिन शुक्रबार ५ हजारभन्दा धेरैको संख्यामा विमान उडान स्थगित वा ढिला भएको अन्तर्राष्ट्रिय सञ्चारमाध्यमहरुले जनाएका छन् ।
सटडाउन जारी रहे आगामी दिन थप उडान कटौती हुनेछन् । संघीय उड्डयन प्रशासन (एफएए) को घोषणाअनुसार ११ नोभेम्बरमा ६ प्रतिशत, १३ नोभेम्बरमा १३ र १४ नोभेम्बरमा १० प्रतिशत कटौती गरिनेछ ।
देशका ४० विमानस्थलमा घरेलु उडान कटौती भएका हुन् । अन्तर्राष्ट्रिय उडानलाई भने यसको असर पर्नेछैन । विमानस्थलका कर्मचारीमध्ये केही बिदामा छन् भने केहीले अतिरिक्त काम गरिरहेका छन् । त्यहीकारण, काममा खटिएका कर्मचारीको कार्यभार बढेको छ । उनीहरुको थकित अवस्था मध्यनजर गरेर उडान कटौतीको निर्णय गरिएको एफएएका प्रमुख बार्यन बेडफोर्डले बताएका छन् ।
‘यो अस्वाभाविक हो,’ बेडफोर्डले उडान कटौतीको घोषणा गर्दै भनेका थिए, ‘जसरी सटडाउन अस्वाभाविक हो । जसरी हाम्रा कन्ट्रोलरहरुले महिना दिनदेखि तलब नपाउनु अस्वाभाविक हो ।’
३८ दिनदेखिको सटडाउनका कारण अमेरिकाका १४ लाख संघीय कर्मचारीले तलब पाइरहेका छैनन् । घरेलु उडान कटौती हुने ४० विमानस्थलको सूचीमा हार्टस्फिल्ड ज्याक्सन अन्तर्राष्ट्रिय विमानस्थल, एटलान्टा विमानस्थल, डालस फोर्ट वर्थ इन्टरनेसनल, डेन्भर इन्टरनेसनल, सिकागो विमानस्थल, लस एन्जलस अन्तर्राष्ट्रिय विमानस्थलजस्ता विश्वकै अति व्यस्त विमानस्थल हुन् ।
