— तान्जानियाको अदालतले गत साताको हिंसात्मक प्रदर्शनमा सहभागी २ सय ४० जनाविरुद्ध देशद्रोहको मुद्दा अघि बढाएको छ । राष्ट्रपति समिना सुलुलु हसन ९८ प्रतिशत मतसहित निर्वाचित भएको उक्त निर्वाचन निष्पक्ष नरहेको भन्दै प्रदर्शन भएको थियो ।
अधिकांश विपक्षीहरुलाई यस निर्वाचनमा सहभागी हुन दिइएको थिएन । उनीहरुमध्ये कतिलाई जेलमा राखिएको थियो भने कतिलाई मनोनयन दर्ता गर्न दिइएको थिएन ।
विपक्षीहरुले यो परिणाम लाजमर्दो भएको टिप्पणी गरेका छन् । निर्वाचनका दौरान भएको आन्दोलनमा सुरक्षाकर्मीले गोली चलाउँदा सयौंको मृत्यु भएको थियो । यद्यपी, सरकारी अधिकारीहरुले हिंसालाई नजरअन्दाज गर्दै निर्वाचन भयरहित र स्वतन्त्र वातावरणमा निष्पक्ष ढंगले सम्पन्न भएको निष्कर्ष निकालेका छन् ।
प्रदर्शनका क्रममा पक्राउ परेकाहरुमाथि अहिले देशद्रोहको मुद्दा चलाइएको छ । दोषी प्रमाणित भएमा उनीहरुमाथि मृत्युदण्ड हुनसक्छ । यद्यपी, तान्जानियामा प्रायजसोः अवस्थामा मृत्युदण्ड फैसला भएकाहरुलाई आजीवन कारावासमा राख्ने गरिएको छ । १९९० को दशकपछि यहाँ कसैलाई मृत्युदण्ड दिइएको छैन ।
मुद्दा लगाइएकामध्ये जेनिफर जोभिन तान्जानियाकी प्रभावशाली व्यवसायी हुन् । उनीमाथि प्रदर्शनकारीलाई उक्साएको आरोप छ । त्यस्तै ठूलो संख्यामा सोशल मिडिया इन्फ्युएन्सर्स पनि पक्राउ परेका छन् ।
