— प्रतिनिधिसभा निर्वाचन प्रयोजनका लागि राजनीतिक दल दर्ता गर्न एक साताभन्दा कम समय बाँकी रहँदा अहिलेसम्म १९ नयाँ दलले निवेदन दिएका छन् । जसमा राजनीतिक पृष्ठभूमिका मात्र छैनन्, जेन-जी समूह, व्यापारी, पूर्वसांसददेखि पूर्वराजदूतसम्म छन् ।
व्यापारी पृष्ठभूमिका बुद्ध एयरका सञ्चालक वीरेन्द्रबहादुर बस्नेतले प्राध्यापक दिनेश प्रसाईँलाई अध्यक्ष बनाएर गतिशील लोकतान्त्रिक पार्टी दर्ताका लागि निवेदन दिएका छन् । त्यस्तै, पूर्वराजदूत नवराज सुवेदीले जनयुग पार्टी दर्ताका निवेदन दिएका छन् । जनमोर्चाको सांसददेखि माओवादी, नयाँ शक्ति हुँदै जसपा पुगेका सुवेदी साउदी अरबका लागि राजदूत नियुक्ति थिए ।
नयाँ पार्टी दर्ता गर्नेमा निवर्तमान सांसद योगेन्द्र मण्डलसमेत छन् । २०७९ को निर्वाचनमा एमालेबाट टिकट नपाएपछि मोरङ-५ बाट स्वतन्त्र उम्मेदवारी दिएर विजयी भएका उनले राष्ट्रिय उर्जाशील पार्टी दर्ताका लागि निवेदन दिएका हुन् ।
जेन-जी समूहबाट अजयकुमार राई नेतृत्वको राष्ट्रिय परिवर्तन पार्टी दर्ताका लागि पनि निवेदन परेको छ । जसमा केही आन्दोलनका घाइते परिवारबाट केन्द्रीय सदस्य छन् भने बाँकी सबै जेन-जी उमेर समूहका व्यक्ति मिलेर पार्टी दर्ता गर्न खोजिएको छ । यस्तै हिराप्रसाद सेती नेतृत्वको राष्ट्रिय जेन-जी पार्टीको नाममा पनि निवेदन परेको छ ।
विगतमा निर्वाचन बहिस्कार गर्दै आएका नेत्रविक्रम चन्दले पनि कम्युनिष्ट पार्टी नेपाल दर्ताका लागि निवेदन दिएका छन् । विगतमा माओवादी निकट ज्ञानेन्द्रबहादुर तामाङले उज्यालो नेपाल पार्टी दर्ता गरेका छन् । पेशाले शिक्षक तामाङ अवकाशपछि सामाजिक काममा सक्रिय थिए ।
मन्त्रीमा सिफारिस भएर अन्तिम समयमा नाम फिर्ता भएका खगेन्द्र सुनारले हाम्रो पार्टी नेपाल दर्ता गराएका छन् । सुन्दर नेपाल निर्माणका अभियन्ता चन्द्रप्रकाश सुवेदीले आफ्नै अभियानलाई पार्टीमा रूपान्तरण गरेर लैजाने गरी सुन्दर नेपाल निर्माण पार्टी दर्ताको निवेदन दिएका छन् । त्यस्तै हिमालबहादुर चन्दले राष्ट्रिय यूवा पार्टी नेपाल, सविन सिग्देलको राष्ट्रनिर्माण पार्टी,रत्नप्रसाद श्रेष्ठको नागरिक सर्वोच्चता र रियाज अहमद शेषको राष्ट्रिय स्वराज पार्टी दर्ताको लागि निवेदन परेको छ ।
आइतबारमात्रै डा. सुन्दरराम बोहराको नागरिक आवाज पार्टी, गणेशकुमार मण्डलको सार्वभौम नागरिक पार्टी, माधवप्रसाद खतिवडा नागरिक बचाउ दल र राजकुमार कक्षपतिको नेपाल कम्युनिष्ट पार्टी बामपन्थी केन्द्रले निवेदन दिएका छन् ।
आयोगमा १ सय २५ राजनीतिक दल दर्ता भइसकेका छन् । गत भदौको जेन–जी आन्दोलनपछि १५ दल दर्ताका लागि आयोगमा निवेदन परेको छ । त्यसमध्ये धरान उपमहानगर प्रमुख हर्कराज राई नेतृत्वको श्रम संस्कृति पार्टीले दल दर्ता प्रमाणपत्र पाइसकेको छ ।
२१ फागुनमा हुने प्रतिनिधिसभा निर्वाचनमा भाग लिन चाहने दलका लागि आयोगले दल दर्ता गराउन कार्यतालिका प्रकाशित गरिसकेको छ । आयोगले प्रकाशन गरेको निर्वाचन कार्यतालिकाअनुसार प्रतिनिधिसभा निर्वाचनका लागि १ देखि १० मंसिरसम्म दल दर्ता गर्नुपर्नेछ । त्यसका लागि ३० कात्तिकभित्रै दल दर्ताको प्रमाणपत्र लिइसक्नुपर्ने आयोगका प्रवक्ता नारायणप्रसाद भट्टराईले बताए ।
