— बीबीसीको पानारोमा शृंखलाअन्तर्गत ‘ट्रम्प : अ सेकेन्ड टाइम ?’ वृत्तचित्रमा यस भाषणलाई काँटछाँट गरेर राखिएको थियो । सुरुका केही शब्दमा अन्त्यतिरका केही शब्द मिलाउँदा आफुले अमेरिकी सदनमा हमला गर्नका लागि जनतालाई उत्तेजित बनाएजस्तो सुनिएको ट्रम्पको आरोप छ ।


अमेरिकी राष्ट्रपति डोनाल्ड ट्रम्पले बीबीसीविरुद्ध मुद्दा दायर गर्नु आफ्नो कर्तव्य रहेको बताएका छन् । फक्स न्युजको ‘द इन्ग्राहम एन्जल’ कार्यक्रममा कुराकानी गर्दै उनले ६ जनवरी २०२१ मा आफुले दिएको भाषणको हत्या गरिएको र दर्शकलाई धोकामा राख्नेगरी यसलाई प्रस्तुत गरिएको बताए ।

बीबीसीको पानारोमा शृंखलाअन्तर्गत ‘ट्रम्प : अ सेकेन्ड टाइम ?’ वृत्तचित्रमा यस भाषणलाई काँटछाँट गरेर राखिएको थियो । सुरुका केही शब्दमा अन्त्यतिरका केही शब्द मिलाउँदा आफुले अमेरिकी सदनमा हमला गर्नका लागि जनतालाई उत्तेजित बनाएजस्तो : सुनिएको उनको आरोप छ । यो वृत्तचित्र सन् २०२४ को अमेरिकी चुनावको एक साताअघि मात्रै सार्वजनिक भएको थियो । बेलायती सञ्चारमाध्यम टेलिग्राफमा बीबीसीको आन्तरिक परिपत्रबारे एक समाचार प्रकाशित भएपछि यो विषय फेरि विवादमा तानिएको हो ।

त्यसयता, ट्रम्पका वकिलले आइतबार बीबीसीलाई पत्र लेखेका थिए । जसमा माफी माग्नुपर्ने र राष्ट्रपति ट्रम्पमाथि भएको हानीको क्षतिपुर्ति दिनुपर्ने उल्लेख थियो । यस विषयमा प्रतिक्रिया दिनका लागि बीबीसीलाई शुक्रबारसम्मको समयसीमा दिइएको छ ।
.
ट्रम्पले सामाजिक सञ्जालमार्फत १ अर्ब डलर क्षतिपुर्तिसहितको मुद्दा दायर गर्ने चेतावनी पनि दिएका थिए । फक्स न्युजसँगको कुराकानीमा उनले आफ्नो त्यही चेतावनी अडान दोहोर्‍याए ।

‘अब मुद्दा हाल्नुहुन्छ ?’ भन्ने प्रश्नको जवाफ उनले यसरी दिए : ‘पक्कै पनि मैले हाल्नुपर्छ । किन हाल्ने किनकी उनीहरुले जनतालाई धोका दिएका छन् र त्यसलाई स्विकारको छन् ।’

ट्रम्पले थपे, ‘उनीहरुले खासमा ६ जनवरीको मेरो भाषण तोडमोड गरे । यो एउटा सुन्दर भाषण थियो । तर, यसलाई उनीहरुले अतिवादीजस्तो सुनिने बनाए ।’



यसअघि सीबीएस र एबीसी न्युजसँग पनि समाचारकै विषयलाई लिएर ट्रम्पले विवाद गरेका थिए । माफी माग्दै क्षतिपुर्तिस्वरुप ती समाचार संस्थाले केही रकम बुझाउने निर्णय गरेपछि यो विवाद सल्टिएको थियो ।

बीबीसीले पनि यस घटनामा माफी मागिसकेको छ । बीबीसीका महाप्रबन्धक डेभी र समाचार प्रमुख टर्नेसले त्रुटि स्विकार गर्दै राजीनामा दिइसकेका छन् । 'त्रुटिहरू भएका छन् । तर संस्थागत रूपमै बीबीसी पूर्वाग्रही छ भन्ने अहिलेका आरोपहरू गलत छन्,' नैतिक जिम्मेवारी लिँदै राजीनामा दिएकी समाचार विभाग प्रमुख टर्नेसले भनेकी छिन् ।

निवर्तमान महाप्रबन्धक डेभीले पत्रकारिताका पक्षमा लड्न बीबीसीका सबै कर्मचारीसँग आग्रह गरेका छन् । उनले प्राविधक त्रुटि भए स्विकार गर्दै कोही-कसैविरुद्ध नियोजित रुपमा लाग्ने नीति बीबीसीको नरहेका बताएका छन् ।