— नवनियुक्त प्रहरी महानिरीक्षक दानबहादुर कार्कीले कार्यालय सहयोगीदेखि वरिष्ठ सई र तिनका आश्रित परिवारलाई आकस्मिक कर्जा उपलब्ध गराइने निर्णय गरेका छन् । बिहीबार पदभार ग्रहणपछि नीति निर्माण समिति(पीसीसी) बैठकमार्फत् प्रहरी कल्याण कोषबाट खर्च हुनेगरी सहुलियत कर्जा उपलब्ध गराउने निर्णय गरेका हुन् ।
५ प्रतिशत ब्याजदरमा कर्जा उपलब्ध गराइने निर्णय भएको प्रहरी प्रधान कार्यालयका एक अधिकारीले बताए ।
उक्त कर्जा स्वास्थ्य, शिक्षा, घरायसी समस्यालगायतका आकस्मिक अवस्थामा दिइनेछ । उक्त कर्जाको सीमा २ लाख रुपैयाँसम्म हुने प्रहरी प्रधान कार्यालयले जनाएको छ ।
कार्की कात्तिक २४ गतेको मन्त्रिपरिषद् बैठकबाट आईजीपीमा बढुवा भएका थिए । त्यसको ३ दिनपछि बिहीबारदेखि उनले ३३औं आईजीपीको जिम्मेवारी सम्हालेका हुन् । सोही जिम्मेवारीअन्तर्गत कर्जा उपलब्ध गराउने उनले पहिलो निर्णय गरेका हुन् ।
