— बंगलादेशकी पूर्व प्रधानमन्त्री शेख हसिनाले गत वर्षको प्रदर्शनमा मानवताविरोधी कुनै काम नगरेको दाबी गरेकी छिन् । बीबीसीसँगको अन्तर्वार्तामा उनले यस्तो दाबी गरेकी हुन् ।
हसिनाविरुद्धको मानवताविरोधी मुद्दामा बंगलादेशको अन्तर्राष्ट्रिय अपराध ट्राइबुनल–१ (आईसीटी–१) ले सोमबार फैसला सुनाउँदै छ ।
भारतमा रहेकी हसिनाले आफुमाथि लागेका मुद्दामा कुनै पनि बयान दिएकी छैनन् । उनले आफ्नो उपस्थिति बिना नै भएको मुद्दको सुनुवाईको कुनै अर्थ नरहने बताउँदै आएकी छिन् ।
बीबीसीसँग विशेष कुराकानी गर्दै उनले नियोजित रुपमा आफुलाई फसाउने प्रयास विपक्षीहरुले गरेकाले छानविनको नाटक अर्थहिन रहेको बताइन् ।
सरकारी अभियोजनकर्ताले उनीविरुद्ध मृत्युदण्ड माग गर्दै मुद्दा दायर गरेका छन् । सोमबारका लागि ढाकास्थित ट्राइबुनलमा सुरक्षा व्यवस्थ कडा पारिएको छ ।
गत जुलाईमा सुरु भएको आन्दोलनमा दमन गर्ने क्रममा मानवताविरुद्धको अपराध गरेको भन्दै हसिनाविरुद्ध मुद्दा चलाइएको हो । हसिनालाई यस दमनको पर्दापछाडिको मुख्य खेलाडी मानिएको छ ।
उनीमाथि हत्याको योजना बनाएको, हत्या प्रयास गरेको, यातना दिएको र अन्य अमानवीय कार्य गरेको आरोपमा छानविन चलिरहेको छ ।
हसिनालाई अपदस्थ गर्ने आन्दोलनमा सहिद भएका व्यक्तिका आफन्त र समग्र देशका लागि सोमबारको फैसला एउटा महत्वपूर्ण परिघटना हुनेछ ।
संयुक्त राष्ट्रसंघको छानविन समितिका सदस्यहरुले जुलाई-अगस्ट २०२४ मा भएको आन्दोलनमा झन्डै १४ सय जना मारिएको बताएका छन् । यद्पयी, फरक अध्ययनहरुले मारिनेको संख्या फरक देखाएका छन् ।
