— भदौ २४ मा आगजनीमा भवन ध्वस्त भएपछि गण्डकी प्रदेश सभाको बैठक कृषि, भूमि व्यवस्था सहकारी मन्त्रालयको सभाहलमा बसिरहेको छ ।
शुक्रबारको बैठकको शून्य समयमा बोल्दै एमाले सांसद् बेदबहादुर गुरुङले प्रदेश सभा भवन जलाउनेलाई कारबाहीको माग गरेका छन् ।
यो माग गरिरहँदा उनले आन्दोलनपछि सार्वजनिक भएको एउटा भिडियोको प्रसंग पनि जोडेका थिए । आगजनीपछि एक जना पुरुषले संसद् भवन जलाएकोमा खुसी व्यक्त गरेर फोनमा कुराकानी गरिरहेको भिडियो सामाजिक सञ्जालमा सार्वजनिक भएको थियो । ‘अँ, भागे उनीहरु विचरा ! पूरै ध्वस्त बनाइयो आज । सबैभन्दा ठूलो भिक्ट्री यही प्रदेश सभा जलाएको हो,’ ती पुरुष फोनमा भनिरहेका थिए ।
उनले कांग्रेस नेता गगन थापा ‘घिसारेर’ कुटपिट गरिनुपर्ने मान्छे भएको पनि बताएका थिए । कान्तिपुर र अन्नपूर्ण मिडिया हाउसमा भएको आगजनी, तोडफोडको खबर सुनेपछि उनले यी मिडिया हाउसमाथि निकै तुच्छ टिप्पणी पनि गरेका थिए ।
उनी प्रदेश सभाको छेउमै रहेको प्रदेश प्रशिक्षण प्रतिष्ठानअगाडि उभिएर फोनमा बोलिरहेको भिडियोमा देखिन्छ । उनी फोनमा बोलिरहँदा प्रतिष्ठानको भवन जलिरहेको थियो । विध्वंस मच्चाएर खुसी मनाउनेसहित संसद् जलाउनेलाई कारबाही गर्न सांसद् गुरुङले माग गरेका हुन् । ‘त्यस्ता अपराधीको भिडियो भाइरल भइराख्दा अहिलेसम्म उनीहरुलाई कारबाही गरेको, पक्राउ गरेको कुरा आएको छैन । त्यसकारण ती अपराधीलाई तुरुन्त कारबाही होस्,’ उनले माग गरे ।
यसरी फोनमा कुराकानी गर्ने युवकको पहिचान खुलेको छैन । सुरक्षा संयन्त्रले उनको पहिचानको प्रयास गरिरहेको छ । कास्की प्रहरीले प्रहरी कार्यालय र व्यक्तिगत सम्पत्तिमाथि आगजनी, तोडफोड र लुटपाट गर्नेलाई पक्राउ गरिरहेको छ । प्रदेश सभा सचिवालयमा आगजनी, लुटपाट र तोडफोड गर्नेहरु भने पक्राउ परेका छैनन् ।
