— उपल्लो डाेल्पाबाट हिँउमा फसेका पाँच जना प्रहरीको हेलिकप्टरबाट उद्धार गरिएको छ । शुक्रबार डाेल्पाेबुद्व गाउँपालिकास्थित धाेबाट नेपाली सेनाको हेलिकोप्टर मार्फत उद्धार गरिएकाे हाे ।
उद्वार हुने प्रहरीमा प्रहरी सहायक निरीक्षक देवदत्त पाण्डे, वरिस्ठ हवल्दार मणिराज जाेशी, हवल्दार जनकबहादुर कार्की, जवान नवराज भट्ट र नरेन्द्र भट्ट रहेका छन् ।
उद्धार गरिएका पाँचै जना शे-फोक्सुन्डो गाउँपालिका-१ निजालगुम्बास्थित अस्थायी प्रहरी चाैकीमा कार्यरत थिए । उनीहरु पाँचै जनालाई गत वैशाखमा नागरिकको शान्ति सुरक्षा गर्न भन्दै उपल्लो डाेल्पामा खटाइएकाे थियाे ।
नाम्दाेबाट धाे हुँदै दुनै पुग्ने भनेर हिँडेकाे करिब ३६ घण्टामा हिउँ र अत्यधिक चिसाेले खुट्टा खाएर हिँड्न नसक्ने अवस्था आएपछि उद्धार गरिएको जिल्ला प्रहरी डाेल्पाका डीएसपी रुकबहादुर खड्काले जानकारी दिए ।
हिउँले उनीहरु सबैकाे हातखुट्टा र अनुहार सुन्निएकाे छ । पाँचै जनालाई हेलिकप्टरबाट सदरमुकाम दुनै ल्याएर सामान्य जाँच पछि थप उपचारका लागि सुर्खेत लगिएको छ ।
निजालगुम्बा क्षेत्रमा बाक्लाे हिउँ जमेर बस्न नसक्ने अवस्था आएपछि पाँचै जनालाई सदरमुकाम दुनैस्थित जिल्ला प्रहरी कार्यालयमा फर्किन निर्देशन गरिएको थियाे । दुनै फर्कने क्रममा हिँउले ज्यानै जाने जाेखिम भएपछि पाँचै जनालाई हेलिकाेप्टरबाट उद्धार गरिएको हाे ।
प्रहरी कर्मचारीलाई कर्तव्यपालनका क्रममा समस्या परेमा प्रहरी प्रधान कार्यालयबाट उद्धार हुने गरिँदै आएकाे केन्द्रीय प्रहरी प्रवक्ता डिआइजी अभिनारायण काफ्लेले जानकारी दिए ।
