— क्रोएसिया विश्वकप २०२६ का लागि शुक्रबार राति छनोट भएको छ । युरोपेली छनोटको समूह ‘एल’ मा उसले फारो आयरल्यान्डलाई ३–१ ले हरायो र यससँगै अर्को वर्ष अमेरिका, क्यानाडा तथा मेक्सिकोमा हुने विश्वकपमा आफ्नो स्थान सुरक्षित गरेको हो ।
फारोले जेजा डेविडको गोलले अप्रत्याशित अग्रता लिएयता क्रोएसियाका लागि जोस्को ग्वार्डिओल, पिटर मुसा र निकोला भ्लासिचले गोल गर्दै जित निश्चित गरे । यो जितपछि सन् २०१८ विश्वकप उप–विजेतालाई अब समूह ‘एल’ मा कसैले उछिन्न सक्ने छैन ।
यसै समूहमा मोन्टेनेग्रोले जिब्राल्टरलाई ३–१ ले हरायो । यस्तै नेदरल्यान्ड्स पनि छनोटको नजिक पुगेको छ र यसका लागि समूह ‘जी’ को खेलमा नेदरल्यान्ड्सले पोल्यान्डलाई १–१ को बराबरीमा रोकेको हो । जर्मनीले आफ्नो छनोटका लागि अन्तिम खेल पर्खिनु पर्नेछ ।
समूह ‘ए’ मा निक वाल्टेमोडको दुई गोलका मद्दतले जर्मनीले लक्जेम्बर्गलाई २–० ले हराए पनि त्यो छनोटका लागि पर्याप्त रहेन । अर्को खेलमा स्लोभाकियाले उत्तरी आयरल्यान्डलाई १–० ले पराजित गर्यो । अन्य प्रमुख खेलमा फ्रान्सले युक्रेनलाई ४–०, आयरल्यान्डले पोर्चुगललाई २–०, इटालीले मोल्डोभालाई २–०, इंग्ल्यान्डले सर्बियालाई २–० ले हरायो ।
