— रौतहट प्रहरीले जग्गा किर्तेमा दुई र कुटपिट, अंगभंग मुद्दामा फरार एक जनालाई पक्राउ गरेको छ ।
कटहरिया नगरपालिका–१ स्थित ९ बिघा १८ कठ्ठा १५ धुर क्षेत्रफलको २४ कित्ता जग्गा किर्ते गरी आफ्नो नाममा दर्ता गरेको आरोपमा हेटौंडा उपमहानगरपालिका–८ का ५२ वर्षीय राधाकृष्ण उपाध्यायलाई पक्राउ गरिएको जिल्ला प्रहरी कार्यालय गौरले जनाएको छ ।
जिल्ला प्रहरीका अनुसार पक्राउ परेका उपाध्यायले अदालतको फैसला र पत्र सरकारी छाप दस्तखत किर्ते गरी नक्कली कागजात तयार पारी किर्ते फैसला र पत्रको आधारमा योजनाबद्ध तरिकाले जग्गा आफ्नो नाममा गराएका थिए । घटना सार्वजनिक भएपछि सम्बन्धित धनी केशरप्रसाद पौडेलले केही समय अघि प्रहरीमा निवेदन दिएका थिए ।
सोही जग्गा किर्ते मुद्दा कटहरिया–१ का ४२ वर्षीय रामपुकार महतो कोइरीलाई कातिक १३ गते नै प्रहरीले पक्राउ गरिसकेको छ । दुवैजनामाथि लिखितसम्बन्धी कसुर तथा किर्ते जग्गा दर्ता प्रकरणमा छानबिन सुरु गरेको प्रहरीले जनाएको छ । जग्गा किर्ते गरे पछि उपाध्याय र महतो लामो समय देखि फरार थिए । उनीहरुलाई शनिबार प्रहरीले सार्वजनिक गरेको छ ।
यता अंगभंग मुद्दामा फरार राजपुर नगरपालिका १ बहुअर्वा गाउका वीरेन्द्र राय यादव शुक्रबार पक्राउ परेका छन् । यादवले बहुअर्बा गाउँस्थित माइती बस्दै आएकी गायत्री देवीलाई रिसिबी साध्ने उद्देश्यले कात्तिक ७ गते बाँसको लाठीले कुटपिट गरी घाइते बनाई फरार भएको प्रहरी निरिक्षक रुद्र कँडेलले बताए ।
