— कार्तिक पूर्णिमाको अवसरमा चार दिनसम्म पाल्पाको सत्यवती मेलाबाट ३९ लाख ७७ हजार भेटी संकलन भएको छ । चिच्याएर वर माग्न पुगेका श्रद्धालुले चढाएको भेटी कार्तिक २० गते गणना सुरु भएर आइतबार सकिएको हो ।
कोलडाँडास्थित सत्यवती बज्यैको मन्दिरमा लागेको मेलामा संकलन भएको भेटी तिनाउ गाउँपालिकाका कर्मचारी, जनप्रतिनिधि, समितिका प्रतिनिधि, सुरक्षाकर्मीको रोहबरमा गणना गरिएको थियो ।
मेलामा पुगेका श्रद्धालुले नगदी रसिदबाट १२ लाख १२ हजार, मेला स्थलको स्टल, परेवा बिक्री, बोका बिक्रीबाट ४ लाख ८७ हजार उठेको छ । श्रद्धालुले चढाएको भेटी २२ लाख ७७ हजार ८ सय ४५ रकम संकलन भएको सत्यवती मन्दिर ताल संरक्षण समितिका अध्यक्ष दानबहादुर गाहाले जानकारी दिए ।
जिल्लामै सबैभन्दा धेरै जनसहभागिता हुने सत्यवती तालमा लागेको मेलामा २ लाख बढी श्रद्धालुले ताल र सत्यवती बज्यै मन्दिरको दर्शन गरेको समितिले जनाएको छ । गत वर्ष भने सत्यवती तालमा लागेको मेलाबाट ३२ लाख ८१ हजार ८ सय ७० रुपैयाँ दान तथा भेटी संकलन भएको थियो । अध्यक्ष गाहाका अनुसार मेलामा भक्तजनले चाँदी र सुनका गहनासमेत सत्यवती बज्यैलाई चढाएको भेटिएको छ । श्रद्धालुले चाँदीका पाउजु, हातमा लगाउने ब्रासलेट, सुनको जन्तर र घाँटीमा लगाउने सिक्री चढाएका छन् ।
सत्यवतीमा संकलन भएको भेटीबाट मन्दिरको विकास तथा सत्यवती तालसम्म आउने सडक पूर्वाधार विकासमा खर्च गरिने समितिका अध्यक्ष गाहाले बताए ।
तिनाउ गाउँपालिका र मन्दिर व्यवस्थापन समितिको संयुक्त लगानीमा मन्दिर आउनेहरूका लागि शौचालय, सडक, खानेपानी, भक्तजन विश्रामस्थलका लागि भेटीबाट संकलन भएको रकमबाट खर्च गरिएको छ । सत्यवती जंगल क्षेत्रमा परापूर्वकालमा सत्यवती बज्यै जंगलको बिचमा तपस्या गरेपछि शक्ति प्राप्त गरेको किंवदन्ती छ ।
सत्यवती बज्यै कानले नसुन्ने बहिरी भएकाले भक्तजनले सत्यवती ताल नजिकै पुगेर चिच्याएर मनमा चिताएको वर माग्ने गर्छन् । बज्यैले मागेको वर पूरा गरिदिने जनविश्वासका आधारमा पुनः भाकल अनुसार श्रद्धालु आउने गर्छन् ।
