— मोरङ हुँदै झापा छिरेको हात्तीको बथान अहिले शिवसताक्षीस्थित रतुवामाई वृक्षरोपण आयोजनाअन्तर्गतको वन क्षेत्रमा रहेको डिभिजन वन कार्यालय झापाले जनाएको छ ।
२५–३० वटाको संख्यामा हुल बाँधेर बच्चासहित हात्तीको बथान झापा छिरेपछि जिल्लाको उत्तरी क्षेत्रमा सतर्कतासहित माइकिङ तथा गस्ती सुरु गरिएको छ ।
डिभिजन वन कार्यालय झापाका प्रमुख भरतबाबु श्रेष्ठका अनुसार शनिबारै शिवसताक्षीस्थित वन क्षेत्रमा आइपुगेको हात्तीको बथान कनकाई माई तरेर पूर्वतर्फ पनि आएको छैन भने पश्चिमतर्फ पनि गएको छैन । ‘हात्तीको बथान शिवसताक्षी धाम आसपास जंगलमा डुलिरहेका छन् । हात्ती र मानव दुवैतर्फ क्षति नहोस् भनेर हामी सचेत छौं । मातहतका कर्मचारी स्थलगत खटिइरहेका छन्,’ उनले भने ।
हात्तीको बथान पूर्व–पश्चिम राजमार्गको उत्तरी भाग हुँदै बाहुनडाँगीबाट भारततर्फ जान सक्ने वन कार्यालयको अनुमान छ । करिब डेढ बर्ष अघि ५०–६० वटाको संख्यामा हात्तीको बथान बाहुनडाँगी क्षेत्र हुँदै नेपाल भित्रिएका थिए । सोमध्ये केही हात्ती भारततर्फ नै फर्किए पनि २५–३० वटाको संख्यामा हात्ती झापा, मोरङ, सुनसरी लगायतका वन क्षेत्रमा रहेका थिए ।
तिनै हात्ती अहिले भारततर्फ फर्कन लागेको वन कार्यालयको अनुमान छ । अहिले मुख्य गरी किसानले धान काट्ने, कुन्यु लगाउने, थन्क्याउने सिजन भएकाले हात्तीको बथानले क्षति पुर्याउने अनुमानस्वरूप सावधान रहन सर्वसाधरणलाई पनि अपिल गरिएको छ भने सबै पालिकालाई पत्राचार गर्दै सतर्क रहन भनिएको कार्यालय प्रमुख श्रेष्ठले जानकारी दिए ।
