: सुनसरीको इटहरीबाट हराएकी मञ्जु पौडेल (निरौला)को शव धरान–४ स्थित सर्दु जलाधार क्षेत्रमा फेला परेको छ। उनको मृत्युको घटना शंकास्पद देखिएको भन्दै प्रहरीले विस्तृत अनुसन्धान सुरु गरेको इलाका प्रहरी कार्यालय धरानका डीएसपी भीषणबाबू राईले बताए।
इटहरी उपमहानगरपालिका–२ बस्ने ३५ वर्षीया मञ्जु गत कात्तिक २४ गते बिहान ८:३० बजे घरबाट निस्किएर बेपत्ता भएकी थिइन्। परिवारजनले हराएको भनी इटहरी प्रहरीमा निवेदन दिएको तीन दिनपछि कात्तिक २७ गते धरान–०४ बौद्ध विहार नजिकको कोशी लोकमार्ग छेउमा रातो लेडिज स्विटर, कालो चप्पल, खैरो ब्याग र सल फेला परेपछि धरान प्रहरीले खोज तथा अनुसन्धान तीव्र पारेको थियो।
उक्त पहिचान परिवारले मञ्जुकै भएको पुष्टि गरेपछि इलाका प्रहरी कार्यालय धरानबाट प्रहरी वरिष्ठ नायब निरीक्षक टिकाराम खत्रीको कमाण्डमा ९ जनाको टोली घटना क्षेत्रतर्फ पठाइएको थियो। उक्त प्रहरी टोलीले मंगलबार सर्दु जलाधार क्षेत्रको खोल्सामा मञ्जुको शव मृत अवस्थामा फेला पारेको हो।
इलाका प्रहरी कार्यालय धरानका डीएसपी भीषणबाबू राईका अनुसार शव भेटिएको स्थान, फेला परेका सामग्री र हराएको समय बीचको मेलका कारण घटना शंकास्पद देखिएको छ। सेन्टिङ, भौगोलिक अवस्था र शरीरको अवस्था हेर्दा घटना सामान्य जस्तो देखिँदैन, विस्तृत अनुसन्धान हुँदैछ, डीएसपी राईले भने।
शव फेला परेपछि अनुसन्धान तथा कानुनी प्रक्रिया पूरा गर्न प्रनि जीवनकुमार कुँवर सहितको टोली घटनास्थलमा खटिएको थियो। प्रहरीले घटनास्थलको कानुनी प्रक्रिया अनुसार मुचुल्का तयार गरि शवलाई पोस्टमार्टमका लागि बीपी कोइराला स्वास्थ्य विज्ञान प्रतिष्ठान धरान पठाइएको छ। मृत्युको कारण र घटनाको प्रकृति पोस्टमार्टम प्रतिवेदन तथा थप अनुसन्धानपछि मात्र स्पष्ट हुने प्रहरीले जनाएको छ।
