: बंगलादेशकी पूर्वप्रधानमन्त्री शेख हसिनाका छोरा सजीब वाजेदले आफ्नी आमालाई दिइएको मृत्युदण्डसँग सम्बन्धित सबै कुरा गैरकानुनीरूपमा भएको बताएका छन्। बंगलादेशको अन्तर्राष्ट्रिय अपराध न्यायाधिकरणले पूर्वप्रधानमन्त्री हसिनालाई मृत्युदण्डको सजाय सुनाएको छ। यो फैसलापछि बंगलादेशले भारतसँग शेख हसिनाको सुपुर्दगीको माग गरेको छ।

समाचार एजेन्सी एएनआईले शेख हसिनाका छोरा सजीब वाजेदसँग उनको सुपुर्दगी र बंगलादेशको राजनीतिक संकटमा भारतको भूमिकाको बारेमा कुरा गरेको छ।


सजीब वाजेदले भने , 'भारत सधैं असल मित्र रहँदै आएको छ। संकटको समयमा, भारतले मेरी आमाको जीवन बचायो। यदि उनी बंगलादेश नछोडेको भए अतिवादीहरूले उनलाई मार्ने योजना बनाएका हुन्थे। त्यसैले, मेरी आमाको जीवन बचाएकोमा म प्रधानमन्त्री मोदीको सरकारप्रति सधैं आभारी रहनेछु।'

हसिनाको प्रत्यर्पणको बारेमा उनले भने, 'प्रत्यर्पणको लागि न्यायिक प्रक्रिया पालना गर्नु आवश्यक छ। बंगलादेशमा कुनै निर्वाचित सरकार छैन। यो असंवैधानिक र अवैध सरकार हो।'

उनले भने, 'मेरी आमालाई दोषी ठहराउन र उनको मुद्दाको गति बढाउन कानुनहरू संशोधन गरिएको थियो। तपाईं संसद बिना कानुनहरू संशोधन गर्न सक्नुहुन्न, जसको अर्थ कानुनहरू गैरकानुनी रूपमा संशोधन गरिएको थियो।'

उनले आफ्नी आमालाई बचाउ गर्न वकिल राख्न समेत नदिएको बताए। मुद्दा चल्नुअघि अदालतका १७ न्यायाधीशरूलाई बर्खास्त गरी नयाँ न्यायाधीश नियुक्त गरिएको उनको भनाइ छ। 'मेरी आमालाई बचाउ वकिल राख्न अनुमति थिएन। उनका वकिलहरूलाई अदालतमा प्रवेश गर्न पनि अनुमति थिएन। मुद्दा चल्नु अघि नै, अदालतका १७ न्यायाधीशहरूलाई बर्खास्त गरियो। नयाँ न्यायाधीशहरू नियुक्त गरियो, जसमध्ये केहीलाई बेन्चमा सेवा गर्ने अनुभव थिएन,'उनले भने,' उनीहरू राजनीतिक रूपमा जोडिएका थिए। यस्तो अवस्थामा, जब सबै कुरा अवैध रूपमा भएको छ। कुनै पनि देशले सुपुर्दगी गर्दैन, सुपुर्दगीको लागि उचित प्रक्रिया अपनाउनुपर्छ।