— भारतको उत्तर प्रदेशमा बस दुर्घटनामा केही नेपाली घाइते भएका छन् । उत्तर प्रदेशको बलरामपुर जिल्लाको फुलवरिया बाइपासमा भएको सडक दुर्घटनामा २१ जना नेपाली घाइते भएका छन् ।
सुनौलीबाट दिल्ली गइरहेको यूपी २२ एटी ०२४ नम्बरको बस मंगलबार बिहान यूपी २१ डीटी ५२३७ नम्बरको मालवाहक ट्रकसँग ठोक्किएको हो । ट्रकसँग ठोक्किएपछि बसमा आगलागी भएको बलरामपुरका एसपी विकास कुमारले कान्तिपुरलाई बताए ।
उनले भने, 'बसमा रहेकामध्ये ३ जनाको मृत्यु भएको छ । उनीहरू कहाँका हुन् भन्ने खुलेको छैन ।' घाइतेमध्ये २१ जना नेपाली रहेका छन् भने २ जना बिहार र १ जना हरियाणाका यात्री रहेका छन् ।
घाइतेहरूमध्ये एक जनालाई मेडिकल कलेज लखनऊ, ५ जनालाई मेडिकल कलेज बहराइच र १ जनालाई मेमोरियल अस्पताल बलरामपुर पठाइएको एसपी कुमारले बताए ।
बाँकी घाइतेहरूको संयुक्त जिल्ला चिकित्सालयमा उपचार भइरहेको प्रहरीले जानकारी दिएको छ । मृतकको शव सनाखतको प्रयास भइरहेको पनि उनको भनाइ छ ।
