— नेता भीम रावलले पुराना पार्टी असफल भएकाले नेपाली कम्युनिस्ट पार्टी(नेकपा) बनाइएको बताएका छन् । सोमबार विराटनगरमा आयोजित एकता सन्देश सभालाई सम्बोधन गर्दै नेता रावलले पुरानो कम्युनिस्ट पार्टीप्रतिको जनताको विश्वास गुमेको बताएका हुन् ।
'जनताले परिवर्तनको अपेक्षासहित दुई तिहाई मत दिए। तर त्यो जनमतलाई दुई पटक संसद् विघटन गरेर कुल्चियो। जनताको सुरक्षा र समृद्धि दिन असफल भएकैले आज १५ वटा घटक मिलेर नयाँ नेपाली कम्युनिस्ट पार्टी बनेको हो,' नेता रावलले भने ।
राष्ट्रिय सुरक्षा प्रणालीमा परिवर्तन, राष्ट्रिय स्वाधिनता तथा अखण्डता जोगाउन नयाँ एकीकृत पार्टी अपरिहार्य भएको बताए। एमाले अध्यक्ष केपी ओलीको दम्भका कारण भदौ २३ र २४ को घटना भएको आरोप लगाउँदै उनले भने,'ओलीको दम्भले पाँच घण्टामै देश जलेर राग भयो ।'
रावलले नयाँ पार्टीको प्राथमिकता भ्रष्टाचारविरुद्ध कठोर कदम, शिक्षा क्षेत्रमा संरचनात्मक सुधार र जनताप्रति जिम्मेवार सरकार निर्माण रहेको स्पष्ट पारे।
नेता प्रमोद नारायण यादवले ओली नेतृत्वकै गलत निर्णयका कारण भदौ २३ र २४ का घटना चर्किएको दाबी गर्दै, अहिलेको आवश्यकता क्रान्तिकारी शक्तिहरूको ध्रुवीकरण भएको बताए।
त्यस्तै नेता चिरन पुनले नेत्रविक्रम चन्द, मोहनविक्रम सिंह, जनार्दन शर्मादेखि घनश्याम भूसालसम्मका नेतृत्वले आन्दोलनलाई आधामा छोडेको आरोप लगाउँदै भने, ' अब तपाईंहरूको अलग–अलग खुद्रा राजनीति चल्नेवाला छैन। नेपाली कम्युनिस्टहरूको उत्तराधिकारी पार्टी यही हो ।'
नेता राजेन्द्र श्रेष्ठले जनयुद्धका उपलब्धिहरू नबुझेर पुराना दलहरूलाई भोट दिनु जनताको हितविपरीत जाने बताए। 'समृद्धि, न्याय र स्थिर सरकार दिन सक्ने पार्टी यही हो,'उनले भने।
