: पर्सामा प्रहरीले गाँजासहित समातेका दुई जनालाई छुटाउन प्रहरी चौकीमै पुगेर हुलहुज्जत गर्न खोजेका व्यक्तिहरू प्रहरीको थप टोली पुगेपछि भागेका छन्। पटेर्वा सुगौली गाउँपालिका-२ रंगपुरटाँडीबाट सोमबार दिउँसो ३ बजेतिर प्रहरी सहायक निरीक्षक रामनिवास सामह नेतृत्वको टोलीले बी ए बी २३९८ नम्बरको कारसहित १०४ केजी गाँजा र कारामा सवार मकवानपुरको मकवानपुर–३ का कुमार स्याङ्ताङ र भीमफेदी–८ का भीम स्याङ्ताङलाई नियन्त्रणमा लिएको थियो।
गाँजा र कारसहित नियन्त्रणमा लिइएका दुवै जनालाई प्रहरी चौकी रंगपुरटाँडीमा राखिएका बेला मंगलबार नै अपरान्ह गाँजाका २ कारोबारी र उनीहरूका ३ जना दलालहरू केही मान्छेहरूको भिड लिएर प्रहरी चौकीमा पुगेर हुलहुज्जत गर्न खोजेका थिए। त्यसपछि प्रहरी सहायक निरीक्षक साहको आग्रहमा इलाका प्रहरी कार्यालय पेटेर्वा सुगौलीबाट प्रहरी निरीक्षक प्रकाश थापा नेतृत्वमा १५ जनाको थप टोली प्रहरी चौकी रंगपुरटाँडीमा पुगेपछि कारोबारी र दलालहरू त्यहाँबाट फरार भएका थिए।
मकवानपुरको मनहरीबाट १० पोका गाँजा लोड गरेर बी ए बी २३९८ नम्बरको कार बाराको जीतपुर, त्यहाँबाट जनता सडक हुँदै पटेर्वा सुगौली गाउँपालिका-१ सोनवर्षातर्फ जाँदै गरेका अवस्थामा प्रहरीले कारमा सवारसहित दुई जनालाई नियन्त्रणमा लिएको प्रहरी सहायक निरीक्षक साहले जानकारी दिए। नियन्त्रणमा लिइएको गाँजासहितको कार र दुई जना व्यक्तिलाई प्रहरी चौकी रंगपुरटाँडीमा राखिएका बेला केही व्यक्तिहरू आएर होहल्ला गर्न खोजेपछि प्रहरीको थप टोली पुग्दा उनीहरू त्यहाँबाट भागेको प्रहरी निरीक्षक थापाले बताए।
नियन्त्रणमा लिइएको गाँजासहितको कार र दुई जना व्यक्तिलाई सोमबारै साँझ जिल्ला प्रहरी कार्यालय पर्सामा पठाइएको उनले बताए। यता गाँजासहित पक्राउ परेकाहरूले गाँजाको तस्करीमा आफूहरूको नाम पोलेपछि त्यसबाट उन्मुक्ति पाउन कारोबारी र दलालहरू मंगलबार बिहानैदेखि जिल्ला प्रहरी कार्यालयमा धाउन थालेको प्रहरी स्रोतले जनाएको छ।
यता प्रहरीले भने गाँजा र तस्करहरू छुटाउन प्रहरी चौकीमा पुगेर हुलहुज्जत गर्न खोजेका कारोबारी र दलालहरू बारे खोजीनीति गरिरहेको जिल्ला प्रहरी कार्यालयका एक प्रहरी अधिकृतले जानकारी दिए। छिमेकी मुलुक भारतको बिहारमा विधान सभाको निर्वाचनका बेला रोकिएको लागूऔषध गाँजा, चरेस र अफिमको तस्करी चुनाव सकिए लगत्तै फेरि सुरु भएको छ। मकवानपुर र धादिङका पहाडी भेगमा उत्पादित गाँजा, चरेस र अफिम भरिया र गाडीमा मार्फत पर्साको ग्रामीण भेगमा ल्याएर भण्डारण गरिन्छ। त्यहाँबाट ती लागूऔषध पर्साको ग्रामीण भेगका नाका हुँदै भारतमा तस्करी हुँदै आएको छ।
