— नेपाली कम्युनिस्ट पार्टीका संयोजक तथा पूर्वप्रधानमन्त्री पुष्पकमल दाहालले राष्ट्रियताको रक्षा र स्वतन्त्रताको जगेर्नाका लागि 'तीन करोड नेपालीकै राष्ट्रिय फौज' निर्माण गरिनुपर्ने विचार व्यक्त गरेका छन्। उनले देशको रक्षा राज्यका सेना–प्रहरी मात्रले सम्भव नभएको २३–२४ भदौका घटनाले प्रमाणित गरिदिएको बताए।
विराटनगरमा आयोजित पार्टी एकता सन्देश सभामा सम्बोधन गर्दै दाहालले भने, 'विदेशी चलखेललाई मात्र सुरक्षा निकायले परास्त गर्न सक्दैनन्। तर तीन करोड नेपालीको शक्ति मिलेर राष्ट्रिय फौज बनाउन सक्ने क्षमता हामीसँग छ। जनतै फौज बन्नुपर्छ, तब मात्रै स्वतन्त्रता र आत्मसम्मान सुरक्षित रहन्छ।'
संयोजक दाहालले समाजवादी क्रान्तिका लागि जनतालाई तयार हुन आह्वान गरे।
उनले मनमोहन अधिकारीदेखि गिरिजाप्रसाद कोइरालासम्मलाई स्मरण गर्दै कम्युनिस्ट र वामपन्थी मात्रको शक्ति अहिलेको चुनौती समाधानका लागि पर्याप्त नहुने धारणा राखे।
'कम्युनिस्ट र वामपन्थी मात्रै मिलेर देशका सबै चुनौती हल हुन्छन् भन्नु मुर्खता हुन सक्छ,' दाहालले भने, 'लोकतन्त्रवादी, प्रगतिशील सबै शक्तिले हातेमालो गरे मात्रै राष्ट्रको संकट समाधान हुन्छ।'
हालैको जेन–जी आन्दोलनले देशलाई गम्भीर मोडमा पुर्याएको उल्लेख गर्दै उनले २४ गतेको घटनापछि ‘नेपाल रहने कि नरहने’ जस्तो भयावह स्थिति सिर्जना भएको बताए। उनले आन्दोलनलाई हल्ला भनेर उडाउन खोज्नेहरु अहिले मौन रहेको टिप्पणी गरे।
दाहालको भनाइमा, तत्कालीन राष्ट्रपति चयनमा पार्टीले सहयोग गरेको र सुशीला कार्कीको सरकार गठन पनि केपी ओलीकै सिफारिसमा भएको हो।
ऐतिहासिक धरोहर जोगाउन समेत सुरक्षा निकाय असफल देखिएको दाबी गर्दै दाहालले भने, 'सेना–प्रहरीले मात्रै देश बचाउन सक्दैनन् भन्ने भदौको घटनाले स्पष्ट गरिदियो। राष्ट्र अझै संकटमा छ, त्यसैले जनशक्तिको सामूहिक बल चाहिन्छ।'
नेपालमा वाम एकता प्रयासहरू विगतमा असफल रहे पनि यो पटकको एमाले–नेकपा–अन्य घटकबीचको एकतालाई दाहालले ‘ऐतिहासिक’ भने।
'यो एकता विगतको जस्तो हैन, नेपालको राजनीतिक इतिहासमै पहिलो हो,'उनले भने, 'अब हामी नयाँ ढंगले अघि बढ्छौँ।'
संयोजक दाहालले वर्तमान सरकार चुनावी सरकार मात्र भएकोले दीर्घकालीन महत्त्वका कुनै पनि सन्धि–सम्झौता नगर्न चेतावनी दिए।
उनले भने, 'सरकारले जसरी पनि निष्पक्ष र सही ढंगले चुनावको वातावरण बनाओस्। चुनाव सही ढंगले होस्, जनताको म्यान्डेट स्पष्ट होस्।'
नेकपाले शिक्षा र स्वास्थ्यलाई सर्वसुलभ बनाउने कार्यमुखी योजना अघि सारेको उनको दाबी छ।
