: पराल, भुसजस्ता कृषिजन्य वस्तु बोकेको ट्रकलाई रोकेर ट्राफिक प्रहरीले अनावश्यक दुःख दिएको भन्दै किसान, चालक र व्यवसायी आन्दोलित भएका छन्।
बाराको पथलैयास्थित नेपाल प्रहरी राजमार्ग सुरक्षा तथा ट्राफिक व्यवस्थापन कार्यालयले केही दिनदेखि यस्तो वस्तुको ढुवानीमा अवरोध सिर्जना गरेर दुःख दिएको भन्दै उनिहरु आन्दोलित भएका हुन्।
उनीहरूले बुधबार दिउँसो पथलैयास्थित ट्राफिकको प्रदेश स्तरीय कार्यालयको मूल गेटमा धर्ना दिएका छन्। धर्नामा बसेका किसान, व्यवसायी र चालकले ट्राफिक प्रहरीले दिने दुःखको अन्त्य हुने वातावरण नभएसम्म आन्दोलन नटुंगिने बताए।
धर्नामा बसेका च्याउ उत्पादक किसान संघका अध्यक्ष सन्तोष कार्कीले भभरलोड (ढालाभन्दा माथि) को बहानामा कृषिजन्य वस्तुको ढुवानी रोकेर ट्राफिक प्रहरीले अन्याय गरिरहेको बताए।
कृषिमा खपत हुने कच्चापदार्थको रुपमा आउने पराल, भुसलगायतको वस्तुलाई सहज ढुवानी हुने वातावरण बनाउने भन्दा पनि दुःख दिएर रोक्ने काम भएपछि आन्दोलित बन्नुको विकल्प नभएको कार्कीको भनाइ थियो।
पथलैयामा केही दिनदेखि यस्तो वस्तु बोकेको सयौं सवारी साधन राजमार्गमा अलपत्र अवस्थामा देख्न सकिन्छ। ट्राफिक प्रहरी उपरीक्षक राजकुमार सिलवालको निर्देशनमा राजमार्गमा खटिएका ट्राफिक प्रहरीले भभरलोड बोकेका सवारी साधनलाई अगाडी बढ्न दिएका छैनन्।
ट्राफिक प्रहरीले रोकेपछि सवारी चालक, किसानको राजमार्गमै बाँस भइरहेको छ। कृषि, पशुपालनमा उपयोग हुने वस्तु बाटोमै रोकिएपछि किसान समेत मारमा परेका छन्।
ठूलो र अग्लो कन्टेनर निर्वादरूपमा चलिरहेको राजमार्गमा कृषिजन्य हलुका वस्तु ढालाभन्दा केही माथि बोकेका ट्रकलाई रोकेर दुःख दिने मनसाय ठीक नभएको आरोप किसान र चालकको छ। कृषिमा आत्मनिर्भर हुनुपर्छ भन्ने सरकारको नीति एकातिर भएपनि सडकमा ट्राफिक प्रहरीले गर्ने व्यवहार फरक भएको भन्दै उनिहरुले दुःख व्यक्त गरेका छन्।
च्याउ उत्पादक संघका महासचिव विकास रिमालले पथलैयामा पछिल्लो समय ट्राफिक प्रहरीले निरन्तर दुःख दिन थालेको बताए। उनले प्रत्येक पटक आउने यस्तो समस्यामा दीर्घकालीन समाधानको बाटो खोज्न जरुरी रहेको बताए। कृषसजन्य वस्तु हलुका हुने हुँदा किसानलाई सहज हुने गरी सरकारले मापदण्ड बनाउनुपर्ने रिमालको भनाइ छ।
चालक सूर्य श्रेष्ठले ट्राफिक प्रहरीलाई पैसा नबुझाएसम्म सडकमा गाडी गुडाउने वातावरण नभएको भन्दै दुखेसो गरे। ‘एकातिर चिट पनि काटिन्छ। अर्कोतिर ट्राफिक प्रहरीलाई पैसा पनि बुझाउनुपर्छ’ चालक श्रेष्ठले भने, ‘पैसा बुझाए छोडिन्छ नत्र यसैगरी सडकमा अलपत्र हुने गरी रोकिन्छ।’
ट्राफिक प्रहरी उपरीक्षक सिलवालले तोकिएको मापदण्डभन्दा बढी (भभरलोड) बोकेका सवारीसाधनलाई रोकेको बताए। ‘हामीले कानुनको पालना मात्रै गरेका हौं। तोकिएको मापदण्डभन्दा बढी बोकेका सवारी साधन रोकेका हौं,’ सिलवालले भने, ‘यसरी ढुवानी गर्न पाउने अरु केही मापदण्ड भए ल्याउँनुस हामी छोडिदिन्छौं भनेका छौं।’ सिललवाले ट्राफिक प्रहरीलाई पैसा बुझाएको भनि लगाएको आरोप पुष्टि गर्न चुनौती दिए।
ट्राफिक प्रहरीले काट्ने चिट भभरलोड मिलानका लागि भएको भन्दै सिलवालले चिट काटेका सवारी साधनले भभरलोड मिलान नगरी हिड्न नपाउने सिलवालको भनाइ छ। सिलवालले व्यवहारिकरूपमा एक छलिसम्म छोड्दै आएको भएपनि धेरै अग्लो पारेर ढुवानी हुन थालेपछि रोकिएको बताए।
ट्राफिक प्रहरीले रोकेका कारण पथलैयामा यतिबेला एक सय भन्दा बढी ट्रक, ट्याक्टर सडकमा रोकिएका छन् ।
ट्राफिक प्रहरीले पराल, भुस बोकेको गाडी रोकेपछि अग्लो कन्टेनरलाई समेत सडकमा रोक्दै आन्दोलित किसान र चालक।
