: प्रधानमन्त्री नरेन्द्र मोदीले शुक्रबार नयाँ दिल्लीस्थित हैदराबाद हाउसमा रूसी राष्ट्रपति भ्लादिमिर पुटिनलाई स्वागत गरे। भारत र रुस बीचको २३ औं वार्षिक बैठक जारी छ। यस बैठकको उद्देश्य रक्षा,व्यापार, ऊर्जा र आर्थिक सहयोग जस्ता प्रमुख क्षेत्रहरूमा साझेदारीलाई अझ सुदृढ पार्नु हो।

पुटिन चार वर्षपछि दुई दिने राजकीय भ्रमणमा भारत आएका हुन्। बिहान पुटिनले राजघाटको भ्रमण गरेका थिए। त्यहाँ उनले महात्मा गान्धीलाई श्रद्धाञ्जली अर्पण गरेका थिए। राजघाट पुग्नुअघि राष्ट्रपति पुटिनलाई राष्ट्रपति भवनमा औपचारिक स्वागत गरिएको थियो। तीनै सशस्त्र सेनाले सम्मान गारत प्रस्तुत गरेका थिए। उनलाई राष्ट्रपति द्रौपदी मुर्मुले स्वागत गरेकी थिइन्।


कुन-कुन सम्झौतामा भयो हस्ताक्षर ?

भारत र रूसबीच सहयोग र आप्रवासन,स्वास्थ्य सेवा र चिकित्सा शिक्षा, खाद्य सुरक्षा र मापदण्ड, ध्रुवीय जहाज र समुद्री सहयोग र मलका विषयमा महत्त्वपूर्ण सम्झौताहरूमा हस्ताक्षर भएको छ।
हस्ताक्षरपछि प्रधानमन्त्री मोदीले भने,'आर्थिक सहयोगलाई नयाँ उचाइमा पुर्‍याउनु हाम्रो साझा प्राथमिकता हो। यो हाँसिल गर्न आज हामीले २०३० सम्मको आर्थिक सहयोग कार्यक्रममा सहमति जनाएका छौं। यसले हाम्रो व्यापार र लगानीलाई विविध,सन्तुलित र दिगो बनाउनेछ।'

उनले भने,'आज राष्ट्रपति पुटिन र मलाई भारत-रूस व्यापार मञ्चमा भाग लिने अवसर मिल्नेछ। मलाई विश्वास छ कि यो मञ्चले हाम्रो व्यावसायिक सम्बन्धलाई नयाँ बल दिनेछ। यसले निर्यात,सह-उत्पादन र सह-नवप्रवर्तनको लागि पनि नयाँ ढोका खोल्नेछ।'

प्रधानमन्त्री मोदीले थपे,'दुई देशहरू बीचको कनेक्टिभिटी बढाउनु हाम्रो मुख्य प्राथमिकता हो। हामी INSTC, उत्तरी समुद्री मार्ग, चेन्नई-भ्लादिभोस्तोक करिडोरमा नयाँ ऊर्जाका साथ अगाडि बढ्नेछौं।'

प्रधानमन्त्री मोदीले युक्रेन संकटदेखि नै आफूहरू निरन्तर संवादमा रहेको बताए। 'शान्तिको बाटो खोज्न हामी सबै मिलेर काम गर्नुपर्छ। हालैका दिनहरूमा भइरहेका प्रयासहरूले मलाई विश्व फेरि शान्तिमा फर्कनेछ भन्ने पूर्ण विश्वास दिन्छ,'उनले भने।

प्रधानमन्त्रीले भने,'मैले सधैं भनेको छु कि भारत तटस्थ छैन। भारतको अडान छ र त्यो अडान शान्तिको लागि हो। हामी शान्तिको लागि हुने हरेक प्रयासलाई समर्थन गर्छौं। हामी शान्तिको लागि हुने हरेक प्रयासमा काँधमा काँध मिलाएर उभिन्छौं।'

रुसी राष्ट्रपति पुटिनले प्रधानमन्त्री नरेन्द्र मोदीको भनाइपछि आफू र मोदीले धेरै पटक एकअर्कासँग कुरा गरेको बताए। उनले भने,'हामी टेलिफोनमा धेरै महत्त्वपूर्ण मुद्दाहरूमा छलफल गरिरहन्छौं। रूस र भारत बीचको पारस्परिक सम्बन्ध धेरै बलियो छ। आर्थिक मुद्दाहरू सहित धेरै क्षेत्रमा हाम्रो पारस्परिक सम्बन्ध बलियो हुँदै गइरहेको छ।'

पुटिनले थपे,'हामी व्यापार,लगानी र प्रविधिमा वार्ता अगाडि बढाइरहेका छौं। रूस र भारतीय आर्थिक सहयोग संगठन मिलेर काम गरिरहेका छन्।'