: सुनसरीको धरान उपमहानगरपालिका-१३ स्थित शिबधारामा शनिबार बेलुका भएको सवारी दुर्घटनामा परी एक जनाको मृत्यु भएको छ। दुर्घटनामा अन्य ११ जना घाइते भएको इलाका प्रहरी कार्यालय धरानका निमित्त प्रमुख प्रहरी निरीक्षक जीवन कुँवरले बताए।
कोशी लोकमार्गमा पर्ने शिबधाराको घुम्तीमा भेडेटारबाट धरानतर्फ आउँदै गरेको प्रदेश–१–०२–००२ च ३८२६ नम्बरको टाटा सुमो गाडी अचानक अनियन्त्रित भई सडक छेउको रुखमा ठोकिँदा दुर्घटना भएको प्रहरी निरीक्षक कुँवरले बताए। दुर्घटनामा परी नामथर नखुलेका २५ वर्षीय पुरुषको मृत्यु भएको छ। टिपर सडकबाट करिब १५ फिट तल खसेको थियो।
दुर्घटनामा घाइते भएका ११ जनालाई तत्काल उद्धार गरी धरानस्थित बिपी कोइराला स्वास्थ्य विज्ञान प्रतिष्ठान लगिएको र उनीहरूको उपचार भइरहेको प्रहरीले जनाएको छ। घाइतेमध्ये विराटनगर-९ बस्ने २८ वर्षीय बेदा मिश्रको अवस्था गम्भीर रहेको प्रहरीले जनाएको छ।
टिपर चालक उदयपुर ताप्ली–२ का श्रेष्ठसहित केहीको अवस्था मध्यम रहेको भए पनि अन्य घाइतेको अवस्था सामान्य रहेको छ। दुर्घटना परेका घाइतेहरूमा विराटनगरका अनु कामत, रोशन कामत, सुनसरी दुहबी–९ का एमडी एकवाल रायन, इटहरीका दुर्गामणि चौधरी, सन्जय पाल, सुगम रौनियार, प्रदीप कुमार दास, मोरङका विशाल माझी र सुनसरी दुहबी–९ का आयुष चौधरी रहेका छन्। प्रहरी निरीक्षक कुँवरले दुर्घटनाको कारणबारे थप अनुसन्धान भइरहेको बताए।
