: नेकपा एमालेका वरिष्ठ उपाध्यक्ष ईश्वर पोखरेलले आफूले राखेका विषय पार्टीको महाधिवेशनमा छलफल हुने विश्वास व्यक्त गरेका छन्। पार्टीको आगामी महाधिवेशनमा छलफलका लागि पार्टी कार्यालयमा छुट्टै अवधारणा पत्र बुझाएपछि उनले विधिसम्मत रूपमा पार्टीको नेतृत्व चयन हुने कुरामा आफू विश्वस्त रहेको बताएका हुन्।
वरिष्ठ उपाध्यक्ष पोखरेलले महाधिवेशन प्रतिनिधि छनोटमा अस्वस्थ प्रतिस्पर्धा हुँदा केही स्थानमा समस्या देखिएपछि अध्यक्षसँगको छलफलपछि समाधान भइसकेको बताए।
यस्तै वरिष्ठ उपाध्यक्ष पोखरेलले आन्तरिक प्रतिस्पर्धालाई निषेध र प्रतिशोधबाट मुक्त गरिनुपर्ने, पार्टीका आन्तरिक कार्यविभाजन र संसदीय तथा राजकीय जिम्मेवारीमा न्यायोचित र पारदर्शी मापदण्ड लागू गरिनुपर्ने, संगठनमा स्वायत्तताको नीतिअनुरुप जनसंगठनलाई परिचालित गरिनुपर्ने लगायतका विषय अवधारणापत्रमा उल्लेख गरे। पार्टीलाई लोकतान्त्रिक विधिद्वारा निर्देशित सामूहिक नेतृत्व, वैज्ञानिक विधि र पद्धतिबाट सञ्चालित भएको संगठित शक्तिको रूपमा विकास गर्नका लागि एकताबद्ध हुन समेत उनले आह्वान गरे।
