— स्ट्रिमिङ प्लाटफर्म, नेटफ्लिक्सले वार्नर ब्रदर्स डिस्कभरीको प्रतिष्ठित फिल्म स्टुडियो र एचबीओ म्याक्ससमेत खरिद गर्ने विषयमा अमेरिकी राष्ट्रपति डोनाल्ड ट्रम्पले आपत्ति जनाएका छन् ।
नेटफ्लिक्सले गएको शुक्रबार मात्रै ७२ अर्ब डलरमा वार्नर ब्रोज अधिग्रहण गर्ने प्रक्रिया अघि बढेको जानकारी दिएको थियो । वासिङ्टन डीसीमा हालै आयोजित कार्यक्रममा ट्रम्पले नेटफ्लिक्सको बजार हिस्सा पहिले नै ठूलो रहेको र यो खरिद सम्झौतापछि थप बढ्ने भएकाले ‘समस्या हुन सक्ने’ टिप्पणी गरेको बीबीसीमा पत्रकार ओस्मन्ड सियाले लेखेका छन् ।
वार्नरले निमार्ण गरेका ‘ह्यारी पोटर’, ‘गेम अफ थ्रोन्स’, ‘लर्ड अफ द रिङ्स’जस्ता चर्चित फ्रेन्चाइजसहित दुवै कम्पनीका विशाल कन्टेन्ट लाइब्रेरी आपसमा गाभ्ने गरी नेटफ्लिक्स र वार्नर ब्रोजले सम्झौता गरेका छन् । यसलाई नियामकका रूपमा अमेरिकी कानुन मन्त्रालयअन्तर्गत रहेको प्रतिस्पर्धा प्रवर्द्धन विभागले स्वीकृति दिन भने बाँकी नै छ । विभागले पनि नेटफ्लिक्स र एचबीओ गाभिँदा स्ट्रिमिङ बजारमा एकाधिकारको वातावरण त हुँदैन भन्नेबारे प्रश्न उठाउन सक्छ ।
यो सम्झौतालाई मनोरञ्जन उद्योगकै सबैभन्दा ठूलो ‘डिल’ का रूपमा लिइएको छ । जोन एफ केनेडी सेन्टरमा आयोजित कार्यक्रममा ट्रम्पले नेटफ्लिक्सको बजार हिस्सा अहिले नै ‘अधिक ठूलो’ रहेको र उसले वार्नर ब्रोज पनि अधिग्रह गरे नेटफ्लिक्सकै प्रभुत्व कायम हुने आशंका व्यक्त गरेका छन् । त्यसकारण खरिद सम्झौता अनुमोदन प्रक्रियामा आफूले प्रत्यक्ष भूमिका खेल्ने उनको भनाइ छ ।
ट्रम्पको यस्तो टिप्पणीका कारण यो प्रक्रिया ‘प्राविधिक विश्लेषणभन्दा व्हाइट हाउसबाट निर्देशित हुने’ शंका बढेको अमेरिकी विश्लेषकहरूले औँल्याएका छन् । नेटफ्लिक्सले कमकास्ट र प्यारामाउन्ट स्काइडान्सलाई उछिनेर वार्नर ब्रोजसँग खरिद सम्झौता गर्न सफल भएको हो ।
यसअघि प्यारामाउन्ट स्काइडान्सका प्रमुख डेभिड एलिसनले पनि वार्नर किन्न खोजेका थिए । एलिसनका पिता ल्यारी एलिसन ट्रम्पका घनिष्ठ मित्र भएकाले नेटफ्लिक्स र वार्नरको मर्जर ट्रम्पले अस्विकार गरेर एलिसनलाई सघाउनसक्ने अड्कबाजी पनि भइरहेको छ ।
