— एमालेका महासचिव शंकर पोखरेलले नेपालमा जनताबाट निर्वाचित संविधानसभाले जारी गरेको संविधान घाइते पारिएको बताएका छन् । उनले लोकतन्त्र कमजोर पारिएको अवस्थामा मुलुकलाई पुर्याइएको पनि बताए ।
भक्तपुरमा आयोजित एमालेको ११ औँ महाधिवेशनको उद्घाटन समारोहलाई सम्बोधन गर्दै महासचिव पोखरेलले विभिन्न गतिविधि गरेर नेपालको संविधान घाइते पारिएको बताए ।
'हामी यस्तो चुनौतीको क्षणमा पार्टीको ११ औँ महाधिवेशन आयोजना गरिरहेका छौं, देशमा जनताले लामो संघर्षबाट प्राप्त गरेको संविधानसभाबाट निर्माण भएको संविधान घायल भएको छ । जनताले दशकौं लामो संघर्षबाट प्राप्त लोकतन्त्र कमजोर बनाइएको छ,' पोखरेलले भने, 'नेपाली जनताले निर्वाचित गरेको प्रतिनिधिसभा विघटन गरिएको छ र मुलुकमा अनिश्चयता, भय र त्रासको वातावरणमा मुलुकलाई पछाडि प्रतिगमनतर्फ धकेल्ने दुष्प्रयत्न भएको बेलामा महाधिवेशन आयोजना गरिरहेका छौं ।'
भदौ २३ र २४ को घटनापछि एमाले र अध्यक्ष केपी शर्मा ओलीविरुद्ध सुनियोजित रुपमा प्रहार भइरहेको पोखरेलको भनाइ थियो ।
भदौ २३ र २४ को पछाडि एमाले र नेतृत्वविरुद्ध संगठित र सुनियोजित रूपमा प्रहार भइरहेको पोखरेलले बताए । एमाले समाप्त भयो भनेर कतिपयलाई लागिरहेको तर षडयन्त्रले सरकारबाट बाहिरिएको उनको भनाइ थियो ।
'भदौ २३ र २४ को घटना पछाडि हाम्रो मुलुकमा पार्टी अध्यक्ष ओलीका विरुद्धमा प्रचारबाजी गरियो । घटनाको जिम्मेवारका रुपमा अध्यक्ष ओलीलाई चित्रण गर्ने दुष्प्रयत्न गरियो । जुन प्रकारका घटना भए नवयुवाको भावनामा खेलेर राष्ट्रविरोधी, लोकतन्त्र विरोधी, गणतन्त्र विरोधी र नेपालका राजनीतिक दलका विरुद्धमा गतिविधि भएको बुझेकै छौं,' पोखरेलले भने ।
षडयन्त्रको जगमा राष्ट्रलाई विध्वंसमा लैजाने प्रयत्न भएको पोखरेलले बताए । मुलुकलाई लोकतन्त्रका दिशामा अगाडि बढाउने संकल्प पार्टीले महाधिवेशनबाट गरेको उनको भनाइ छ ।
