— च्याम्पियन लुम्बिनी लायन्सका कप्तान रोहित पौडेल नेपाल प्रिमियर लिग (एनपीएल) २०२५ मा शनिबार नेपाली तर्फको उत्कृष्ट खेलाडी घोषित भएका छन् । उनको नेतृत्वमा लुम्बिनीले लगातार छैटौँ खेल जितेर उपाधि चुमेको हो ।
त्रिवि अन्तर्राष्ट्रिय क्रिकेट मैदानमा फाइनलमा लुम्बिनीले सुदूरपश्चिमलाई छ विकेटले पराजित गरेको हो । नेपाली राष्ट्रिय टिमका कप्तान पनि रहेका रोहितले एनपीएल दोस्रो सिजनमा २ सय ७६ रन बनाए । फाइनलमा उनले १२ बलमा १६ रन बनाए ।
दुवै सिजन गरेर रोहितले प्रतियोगितामा बनाएको रन संख्या ५ सय ५५ पुगेको छ । बलबाट पनि उनी उत्तिकै सफल रहे । उनले फाइनलमा १२ रनमा तीन विकेट लिए । यसक्रममा उनले ह्याट्रिक गरेका हुन् ।
यस सिजन उनले लिएको विकेट संख्या १० पुगेको छ । उत्कृष्ट खेलाडी चुनिएसँगै उनले 'जेइको जे–५' एसयूभी पनि जिते । उनी एनपीएल प्रतियोगिताको इतिहासमै सर्वाधिक रन बनाउने खेलाडी पनि हुन् ।
यसैगरी लुम्बिनीका रुबेन ट्रम्पलमन विदेशीतिरका उत्कृष्ट खेलाडी बने । उनले १० खेलमा १५ विकेट लिएका छन् ।
