: पाकिस्तानी गुप्तचर निकायसँग सम्बन्ध राखेको र उनीहरूसँग रक्षासम्बन्धी कागजातहरू दिएको आरोपमा आसामको तेजपुरमा एक सेवानिवृत्त भारतीय वायुसेनाका अधिकारीलाई पक्राउ गरिएको छ। पक्राउ पर्नेमा अवकाश प्राप्त कुलेन्द्र शर्मा रहेको सोनितपुर जिल्लाका वरिष्ठ प्रहरी उपरीक्षक बरुण पुरकायस्थले जनाएका छन्।
'सन् २००२ मा भारतीय वायुसेनाबाट अवकाश लिएका यी व्यक्ति लगभग दुई हप्तासम्म हाम्रो निगरानीमा थिए। यस सम्बन्धमा, उनी र उनको सामाजिक सञ्जाल खाताहरूबाट धेरै कागजातहरू जफत गरिएको छ,' प्रहरी अधिकारीले भने, 'शर्मालाई पाँच दिनका लागि प्रहरी हिरासतमा लिइएको छ।'
उनलाई भारतको सार्वभौमसत्ता, एकता र अखण्डतालाई खतरामा पार्ने कार्य, भारत सरकारविरुद्ध युद्ध छेड्ने, आपराधिक षड्यन्त्र र प्रमाण नष्ट गर्ने आरोपमा पक्राउ गरिएको प्रहरीले जनाएको छ।
प्रहरीका अनुसार २००२ मा भारतीय वायुसेनाबाट अवकाश लिएपछि उनी तीन वर्षअघि तेजपुर विश्वविद्यालयमा इलेक्ट्रोनिक्स र कम्युनिकेसन इन्जिनियरिङ विभागमा प्राविधिक सहायकको रूपमा कार्यरत रहेको बीबीसीमा समाचार छ।
प्रहरीको प्रारम्भिक अनुसन्धानबाट उनले राष्ट्रिय सुरक्षासँग सम्बन्धित केही महत्त्वपूर्ण जानकारी अज्ञात व्यक्तिहरूलाई दिएको खुल्न आएको छ।
