— नेपाली वस्तुको प्रचारप्रसार तथा पर्यटन प्रवर्द्धनको लागि चीनको केन्द्रशासित छोङछिङमा पहिलो पटक नेपाल पेभेलियन खुल्ने भएको छ । यससम्बन्धी एमओयूमा चिनियाँ र नेपाली पक्षबीच शुक्रबार हस्ताक्षर भएको हो ।
छिमेकी सिचुवान प्रान्तबाट नेपाली महावाणिज्य दूतावासका कर्मचारी, नेपाल पर्यटन बोर्ड र छोङछिङ नगरपालिका, यु चोङ जिल्लाका कर्मचारीहरूलगायतको उपस्थितिमा नेपाल-चीन कार्यकारी परिषद्का अध्यक्ष अनुपरञ्जन भट्टराई र छोङछिङ इन्टरनेसनल कम्युनिकेसन एन्ड कोअपरेसन अलाइन्स (आईसीसीए) प्रतिनिधि च्या युबीच हस्ताक्षर भएको हो ।
परिषद्का अध्यक्ष भट्टराईका अनुसार आगामी जनवरीमा चिनियाँ टोली नेपालमा गएर नेपाली उत्पादन संकलन गर्ने र तत्स्थानमा लगेर प्रवर्द्धन गर्ने योजना छ । हिमालय एयरलाइन्सको हवाई उडानबाट सिधा जोडिएको छोङछिङमा खोलिएको पेभेलियनमा नेपालसम्बन्धी झल्को दिने कलावस्तुहरू राखिनेछ ।
सिचुवान प्रान्तीय छङ्तुस्थित नेपाली महावाणिज्यदूत सुरेश राउतले चिनियाँहरूलाई नेपाली उत्पादनबारे खासै जानकारी नभएकाले पर्यटन तथा निर्यातमा टेवा पुर्याउन यस्ता पेभेलियनले सघाउने विश्वास व्यक्त गरे । उनले भने, आपसी सहकार्य बढाउनका लागि चीनले यस्तो प्रस्ताव ल्याएको हो । व्यापार हुँदै जनस्तरीय सम्बन्ध पनि विकास हुने भएकाले चीनले यसलाई प्रोत्साहन पनि गर्दै आएको छ ।
चिनियाँ पिपुल्स डेली अनलाइनका अनुसार चीन-नेपाल कूटनीतिक सम्बन्ध स्थापनाको ७०औं वार्षिकोत्सव र नेपाली राष्ट्रिय मण्डपको सुरुवात छोङछिङ नगरपालिकाको युचोङ जिल्लामा गरिएको हो । यसबाट दुवै पक्षबीच अर्थतन्त्र, व्यापार, संस्कृति र पर्यटनको क्षेत्रमा सहयोगका नयाँ अध्याय थपेको अनलाइनले लेखेको छ ।
चिनियाँ निजी आयातकर्ताले नेपाली सामानहरू ल्याउने र प्रदर्शन गर्ने जिम्मा लिएको भन्दै महावाणिज्यदूत राउतले नेपाली उत्पादनलाई चिनियाँ उपभोक्तामाझ प्रवर्द्धन गर्ने मुख्य उद्देश्य रहेको बताए । सन् २०२१ मा नेपाली महावाणिज्यदूतावास खोलेदेखि नै यो अभियान चलाएको उनले सुनाए ।
युचोङ जिल्ला समितिका स्थायी समिति सदस्य तथा जिल्ला उपमेयर तङ क्वाङहुआईले युचोङमा नेपाल राष्ट्रिय मण्डपको आधिकारिक अनावरण चीन र नेपालबीचको मित्रताको प्रतीक मात्र नभई दुई पक्षबीचको सहयोग संस्थागतमा महत्त्वपूर्ण कोसेढुङ्गा भएको बताए । उनले भने, ‘नेपाल मण्डपले नेपालको संस्कृति, पर्यटन र विशिष्ट उत्पादनहरू प्रदर्शन गर्न महत्त्वपूर्ण झ्यालको रूपमा काम गर्नेछ ।
छोङछिङ र नेपालसँग दक्षिणपश्चिम चीनबीच आदानप्रदान र सहयोगको लागि नियमित पुल पनि निर्माण गर्नेछ । नेपाल र अन्य देशका साथीहरूलाई लगानी गर्न र व्यवसाय सुरु गर्न, विचार आदानप्रदान गर्न, एकअर्काबाट सिक्न र व्यावहारिक सहयोगमा संलग्न हुन, स्रोत पूरकता, औद्योगिक अन्तरक्रिया र दुई क्षेत्रहरूबीच जनता-जनता सम्पर्कलाई अझ प्रवर्द्धन गर्न समर्थन गर्ने छ।’
हालसम्म चीनका छङ्तु, खुनमिङ, छिङताउ लगायत विभिन्न स्थानमा नेपाली पेभेलियन खोलिएका छन् । नेपाली महावाणिज्य दूतावास रहेको सिचुवान प्रान्तमा ४ वटा नेपाली पेभेलियन छन् । विश्वका विभिन्न देशका महावाणिज्यदूतावास रहेको स्थानमा आआफ्नै शैलीका पेभेलियन राखिएका महावाणिज्यदूत राउतको भनाइ छ ।
नेपालको निर्यात बढाउन, पर्यटन विस्तार गर्न र चिनियाँ उपभोक्तालाई नेपाली वस्तुबारे जानकारी दिन यस्ता पेभेलियनले सहयोग गरेको नेपाली व्यवसायीहरू बताउँछन् ।
