: राजस्व छलेर भित्र्याइएको आशंकामा वीरगन्जबाट प्रहरीले करिब ४ करोड ७७ लाख ४० हजार रुपैयाँ मूल्य बराबरको १८०० बोरा सुपारी बरामद गरेको छ। वीरगन्ज महानगरपालिका-२ बाइपास सडकस्थित निशान्त रोनावतको उद्योगको गोदाम र गोदाम अगाडि रहेको दुईवटा कन्टेनर गाडीबाट बिहीबार प्रहरीले १८०० बोरा सुपारी बरामद गरेको हो।
तेस्रो मुलुकबाट वीरगन्ज भन्सार नाका हुँदै भित्र्याइएको उक्त परिमाणको सुपारी महोत्तरीको बर्दिवास पठाउनु पर्नेमा कन्टेनरबाट अनलोड गरेर वीरगन्जको गोदाममा भण्डारण गर्ने क्रममा प्रहरीले छापा मारेर बरामद गरेको पर्साका प्रहरी उपरीक्षक सुदिपराज पाठकले जानकारी दिए।
प्रहरी उपरीक्षक पाठककै नेतृत्वमा खटिएको टोलीले गोदाम अगाडि रोकेर राखेको ना ७ ख ७४२० र ना ४ ख ६८३२ नम्बरको कन्टेनर गाडीबाट ९०० बोरा तथा गोदामभित्र भण्डारण गरिएको ९०० बोरा गरि कूल १८०० बोरा सुपारी बरामद गरेको हो। ती दुवै कन्टेनर गाडीका चालकद्वय बाराको जीतपुरसिमरा उपमहानगरपालिका-२० का ४१ वर्षीय रामभरोस महरा र जीतपुरसिमरा उपमहानगरकै वडा नम्बर १९ का ५१ वर्षीय रामप्रसाद यादवलाई पनि प्रहरीले नियन्त्रणमा लिएको प्रहरी उपरीक्षक पाठकले जानकारी दिए।
बरामद सुपारीसहितका दुई वटा कन्टेनर गाडी आवश्यक अनुसन्धान तथा कारबाहीका लागि बिहीबार नै साँघ राजस्व अनुसन्धान कार्यालयमा बुझाइएको प्रहरी उपरीक्षक पाठकले जानकारी दिए। वीरगन्ज भन्सार नाका हुँदै भित्र्याइएको उक्त सुपारीको कागजातमा उक्त सुपारीको अन्तिम गन्तव्य स्थान महोत्तरी लेखेको उल्लेख रहेकोमा सिधै महोत्तरी नपठाइ कन्टेनर खोलेर गोदाममा भण्डारण गरेकाले शंकास्पद देखिएपछि प्रहरीले छापा मारेर नियन्त्रणमा लिएको प्रहरी उपरीक्षक पाठकले बताए।
उक्त सुपारी रोशन रनावत नाम गरेका व्यापारीको रहेको र उनि सुपारी लगायतका सामानको अवैध कारोबार गर्ने व्यक्ति रहेको प्रहरी स्रोतले जनाएको छ। प्रहरीले बरामद गरेको सुपारीको सम्पूर्ण कागजात वैध रहेको दाबी गरे पनि वीरगन्ज नाकाबाट राजस्व तिरेर भित्र्याएर अवैध रूपमा भारत निर्यात गर्ने तयारी गरिरहेको सूचनाको आधारमा प्रहरीले छापा मारेर नियन्त्रणमा लिइएको प्रहरीले जनाएको छ।
