— नेपाल र भारतबीच पर्यटन सहकार्य विस्तार गर्ने लक्ष्यका साथ पोखरामा दोस्रो इन्डिया–नेपाल टुरिजम मिट सम्पन्न भएको छ। नेपाल पर्यटन बोर्डले काठमाडौंस्थित भारतीय दूतावास र पोखरा पर्यटन परिषद्सँगको सहकार्यमा २०८२ आयोजना गरेको उक्त कार्यक्रम विशेषतः भारतको उत्तर प्रदेश र नेपालको गण्डकी प्रदेशबीच पर्यटन साझेदारी सुदृढ गर्ने विषयमा केन्द्रित थियो।
गण्डकी प्रदेशको पर्यटन सम्भावनालाई अन्तर्राष्ट्रिय बजारमा प्रवर्द्धन गर्ने उद्देश्यले आयोजित कार्यक्रममा अन्तर्राष्ट्रिय सहकारी वर्षसमेत मनाइएको थियो। गण्डकी प्रदेशका मुख्यमन्त्री सुरेन्द्रराज पाण्डेले पोखरा र मुक्तिनाथ क्षेत्रलाई केन्द्रमा राख्दै भारतसँग बढ्दो पर्यटन सहकार्यलाई सकारात्मक र स्वागतयोग्य कदमका रूपमा उल्लेख गरे।
भारतीय दूतावासका नियोग उप–प्रमुख डा. राकेश पाण्डेले कनेक्टिभिटीमा आएको सुधारले अन्तरदेशीय पर्यटनलाई नयाँ गति दिएको बताउँदै नेपाल र भारतका धार्मिक तथा सांस्कृतिक पर्यटन सर्किटहरूको संयुक्त प्रवर्द्धनमा सहकार्य अपरिहार्य रहेको धारणा व्यक्त गरे। सीमा क्षेत्र केन्द्रित पर्यटनलाई व्यवस्थित रूपमा अघि बढाउन दुवै पक्षबीच समन्वय आवश्यक रहेको उनले बताए।
यस अवसरमा उत्तर प्रदेश पर्यटनका सहनिर्देशक दिनेश कुमारले उत्तर प्रदेशका प्रमुख पर्यटन सर्किटहरूबारे प्रस्तुति दिएका थिए। उनले आगामी माघ मेलालाई विशेष आकर्षणका रूपमा प्रस्तुत गर्नुका साथै प्रदेशमा पर्यटन नीति कार्यान्वयनका क्रममा अपनाइएका अभ्यासहरूबारे जानकारी गराए।
कार्यक्रमअन्तर्गत आयोजित बीटुबी सत्रमा भारतबाट करिब १० जना तथा नेपालबाट ६० जना पर्यटन व्यवसायी र टुर अपरेटरहरूको सहभागिता रहेको थियो। छलफलमा स्थलमार्गमार्फत हुने अन्तरदेशीय पर्यटन प्रवर्द्धन, बौद्ध सर्किट, वन्यजन्तु, साहसिक तथा आध्यात्मिक पर्यटन क्षेत्रमा सम्भावित सहकार्यका विषयमा केन्द्रित संवाद भएको नेपाल पर्यटन बोर्डले जनाएको छ।
यसै कार्यक्रमको निरन्तरताका रूपमा नेपाल पर्यटन बोर्ड र पोखरा पर्यटन परिषद्को सहकार्यमा उत्तर प्रदेशका प्रतिनिधिमण्डलका लागि २०८२ मंसिर २९ देखि पौष २ गतेसम्म परिचयात्मक भ्रमण (फ्याम ट्रिप) आयोजना गरिएको थियो। उक्त भ्रमणमार्फत पोखरा र आसपासका गन्तव्यहरूको प्रत्यक्ष अनुभवले पर्यटन सहकार्यलाई व्यवहारिक तहमा विस्तार गर्ने अपेक्षा गरिएको बोर्डको भनाइ छ।
नेपाल पर्यटन बोर्डले यस्ता क्षेत्रीय तथा अन्तरदेशीय कार्यक्रमहरूले नेपाल–भारत पर्यटन सम्बन्धलाई थप सुदृढ बनाउने विश्वास व्यक्त गरेको छ।
