: कोशी प्राइड लिग (केपीएल)को तेस्रो संस्करण फागुन ९ देखि २१ गतेसम्म हुने भएको छ। कोशी प्राइड प्रालिले आइतबार काठमाडौंमा पत्रकार सम्मेलन गर्दै प्रतियोगिताबारे जानकारी दिएको हो।
प्रतियोगिता सुनसरीको इनरुवास्थित डा.खलील आजाद क्रिकेट मैदानमा तेस्रो संस्करणको केपीएल आयोजना गरिनेछ।
प्रतियोगिताको यस संस्करणमा नमुना ब्लास्टर्स, इटहरी आदर्श जायन्ट्स, बिर्तामोड हिट्स, पूर्वेली सुपर किंग्स, एभरेस्ट थन्डर्स, बीएन कोशी अर्ना र गोर्खा एभेन्जर्स गरी सात टिमले सहभागिता जनाउने आयोजकले जनाएको छ।
घरेलु क्रिकेटमा कोशी क्रिकेट संघले केपीएल आयोजना हुँदा अन्य प्रदेशलाई पनि घरेलु लिग गर्न प्रोत्साहन मिल्ने नेपाल क्रिकेट संघ (क्यान)का सचिव पारस खड्काले बताए। ‘आफैँले निजी मैदानलाई परिपक्व बनाएर केपीएल गर्नु अन्य प्रदेशहरूलाई पनि यस्तै ठूलो लिग गर्न प्रोत्साहन मिल्नेछ,’ उनले लिगका लागि कोशी क्रिकेट संघलाईं शुभकामना पनि दिए।
पत्रकार सम्मेलनमा प्रतियोगिताका प्राविधिक निर्देशक एवम् सुनसरी क्रिकेट संघका अध्यक्ष चेतनाथ पौडेलले कोशी प्रदेशमा क्रिकेट विकास र ग्रासरुट क्रिकेटलाई मजबुत बनाउने उद्देश्यका साथ प्रतियोगिता आयोजना गरिएको बताए। ‘हामीले लामो समयदेखि विभिन्न प्रतियोगिता गर्दै आएका छौँ। क्यान निलम्बित हुँ पनि हामीले प्रतियोगिता गरेका थियौँ। कोशीमा राम्रो मैदान नहुँदा अहिले आएर नयाँ मैदानमा केपीएल हुनु सुखद पक्ष हो,’ यो लिगले घरेलु क्रिकेटलाई माथि उकास्न मद्दत पुर्याउने उनले बताए।
प्रतियोगितामा सहभागी टिममा ११ खेलाडी रहने आयोजकले जनाएको छ। जसमा एक मार्की, एक आइकोनिक, राष्ट्रिय टिमबाट ड्राफ्ट हुने तीन खेलाडी, क्याटगोरी ‘ए’ का तीन, ‘बी’ का दुई र ‘सी’ का एक खेलाडी अनिवार्य हुनुपर्ने व्यवस्था गरिएको कोशी प्राइड प्रालिले जानकारी दिएको छ।
क्याटगोरी ‘ए’ को मूल्य ४५ देखि ६५ हजार, क्याटगोरी ‘बी’को लागि २५ देखि ४५ हजारसम्म हुनेछ। क्याटगोरी ‘सी’ को खेलाडीलाई ५ देखि २५ हजार रकम तोकिएको छ।
