: शेरबहादुर खड्का स्मृति प्रतिष्ठानको आयोजनामा नवौं राष्ट्रिय महिला भलिबल प्रतियोगिता पुस २३ गतेदेखि सुरू हुने भएको छ । प्रतिष्ठानले बिहीबार काठमाडौंमा पत्रकार सम्मेलन गर्दै पुस २३ देखि २६ गतेसम्म त्रिपुरेश्वरस्थित राष्ट्रिय खेलकुद परिषद्को कभर्ड हलमा नवौं राष्ट्रिय महिला भलिबल प्रतियोगिता आयोजना गर्न लागिएको जनाएको हो ।
प्रतियोगितामा साविक विजेता नेपाल पुलिस क्लब,सशस्त्र प्रहरी बलको एपीएफ क्लब,न्यु डायमन्ड युथ स्पोर्टस क्लब, त्रिभुवन आर्मी क्लब र एभरेष्ट भलिबल क्लब गरी ५ टोलीको सहभागिता रहने छ आयोजकले जनाएको छ ।
सहभागी टोलीलाई २ समूहमा विभाजन गरि लिग कम नकआउटका आधारमा हुने बताइएको छ । प्रतियोगिताको विजेता टोलीले उपाधिसहित ५ लाख रुपैयाँ पुरस्कार र उपविजेताले २ लाख ५० हजार तथा तेस्रो हुने टोलीलाई १ लाख २५ हजार रुपैयाँ नगद प्रदान गरिने प्रतिष्ठानले जनाएको छ ।
त्यसैगरी सर्वोत्कृष्ट खेलाडीलाई ५० हजार रुपैयाँसँगै अन्य पुरस्कार प्रदान गरिने र विधागततर्फ उत्कृष्ट हुनेलाई जनही २५ हजार र हरेक खेलको प्लेयर अफ द म्याचलाई १५ हजार रुपैयाँ पुरस्कार प्रदान गरिने प्रतिष्ठानले जनाएको छ।
