: सिन्धुलीमा एक जना युवकको गोली लागेर मृत्यु भएको छ। सुनकोसी गाउँपालिका-५ बन्दिपुरका भिमबहादुर तामाङका छोरा २२ वर्षीय आशमान तामाङको गोली लागेर मृत्यु भएको हो।
जिल्ला प्रहरी कार्यालय सिन्धुलीका प्रमुख लालध्वज सुवेदीका अनुसार मृतक आशमानलाई सोमबार आफ्नो घरभन्दा करिब ३ किमि दक्षिणमा रहेको सिन्धुलीको घ्याङलेख गाउँपालिका १ पिउरी खोलाको जङ्गलमा उत्तानो परी नाईटोबाट रगत बगी मृत अवस्थामा फेला परिएको थियो।
घटनाको प्रारम्भिक अनुसन्धानको क्रममा मृतक आशमान तामाङको पेटको भागमा गोली लागेको अवस्थामा रहेको, मृतकको लास नजिक एक थान भरुवा बन्दुकबिच भागमा भाँचिएको अवस्थामा फेला परेको र मृतकले भिरेको अवस्थामा रहेकोले उनको गोली लागी मृत्यु भएको हुन सक्ने प्रहरीले जनाएको हो।
उनले भिरेको झोलामा निलो रङको बिर्को भएको बट्टामा बारुद जस्तो देखिने कालो रङको धुलो र रातो बिर्को भएको बट्टा भित्र बारुद जस्तो फलाम र सिसाको टुक्रा समेत फेला परेको प्रहरीको भनाई छ। घटनास्थलमा लास जाँच मुचुल्का पश्चात मृतक तामाङको शव पोष्टमार्टमको लागि सिन्धुली अस्पताल ल्याई राखि घटनाको सम्बन्धमा थप अनुसन्धान कार्य भई रहेको प्रहरी प्रमुख सुवेदीको भनाई छ। उक्त घटना हेर्दा मृतक तामाङ आफैँले बन्दुक चलाउँदा पड्किएर दुर्घटना भएको वा अरु कसैले कर्तव्य गरि हत्या गरेको हुन सक्ने आशंका गरिएको छ। उक्त घटनाका सम्बन्धमा प्रहरीको टोली अनुसन्धान थालेको छ।
