: एनभिए महिला तथा पुरुष भलिबल च्याम्पियनसिप अन्तर्गत पुरुषतर्फको शारीरिक विजेता टिपटप हेल्प नेपालले उपाधि रक्षा गरेको छ। शनिबार त्रिपुरेश्वरस्थित राष्ट्रिय खेलकुद परिषद् (राखेप)को कभर्ड हलमा भएको पुरुषतर्फको फाइनल खेलमा त्रिभुवन आर्मी क्लबलाई ३–० को सोझो सेटले पराजित गर्दै उपाधि रक्षा गरेको छ।
टिपटपले आर्मीलाई २५-२१, २५-२१ र २५-२१मा पराजित गरेको हो। त्रिभुवन आर्मी क्लब लगातार दुईपटक उपविजेतामा सीमित बनेको हो। गत संस्करणमा पनि टिपटप हेल्प नेपालसँग पराजित हुँदै आर्मी उपविजेतामा सीमित बनेको थियो। यसअघि महिला तर्फको फाइनल खेलमा न्यु डाइमण्ड स्पोर्ट्स क्लबले नेपाल पुलिस क्लबलाई ३-० को सोझो सेटमा पराजित गर्दै उपाधि जितेको हो।
महिला र पुरुष दुवैतर्फको आज बिहान भएको तेस्रो स्थानको खेलमा महिला तर्फ नेपाल एपीएफ क्लबले त्रिभुवन आर्मी क्लबलाई ३-०को सोझो सेटमा पराजित गर्दै तेस्रो स्थान हासिल गरेको छ। पुरुषतर्फ नेपाल पुलिस क्लबले रुकुम पश्चिम भलिबल ट्रेनिङ सेन्टरलाई ३-२ को सेटमा पराजित गर्दै तेस्रो स्थान हासिल गरेको हो।
महिला तर्फको विजेता न्यु डायमण्ड स्पोर्ट्स क्लब तथा पुरुष दुवैतर्फको विजेता टिपटप हेल्प नेपालले ट्रफीसहित समान नगद ५ लाख रुपैयाँ प्राप्त गर्ने छन्।
उपविजेता महिला तर्फको नेपाल पुलिस क्लब र पुरुष तर्फको उपविजेता त्रिभुवन आर्मी क्लबले २ लाख ५० हजार रुपैयाँ प्राप्त गर्ने छन् । तेस्रो हुने महिला तर्फको नेपाल एपिएफ क्लब र पुरुष तर्फको नेपाल पुलिस क्लबले टोलीले १ लाख २५ हजार रुपैयाँ पुरस्कार प्राप्त गर्नेछन्।
त्यसैगरी, उत्कृष्ट महिला तथा पुरुष खेलाडीलाई जनही २५ हजार रुपैयाँ प्रदान गरिनेछ। विधागततर्फ उत्कृष्ट महिला तथा पुरुष खेलाडीलाई जनही १५ हजार रुपैयाँ पुरस्कार प्रदान गरिने आयोजक नेपाल भलिबल संघ (एनभीए) ले जनाएको छ।
