: भेनेजुएलाका राष्ट्रपति निकोलस मादुरोले अमेरिकी अदालतमा आफूलाई अपहरण गरेर ल्याइएको दाबी गरेका छन्। उनले आफू अझै पनि भेनेजुएलाको वैध राष्ट्रपति भएको र सबै आरोपहरू निराधार रहेको बताएका छन्।
न्यूयोर्क सहरस्थित संघीय अदालतमा सोमबार उपस्थित हुँदा न्यायाधीश एल्भिन हेलरस्टाइनले पहिचान पुष्टि गर्न आग्रह गरेपछि मादुरोले स्पेनी भाषामा भने, हो, म निकोलस मादुरो हुँ। म भेनेजुएला गणराज्यको राष्ट्रपति हुँ। मलाई जनवरी ३ देखि अपहरण गरेर यहाँ ल्याइएको हो। मलाई काराकासस्थित मेरो घरबाट जबरजस्ती लगिएको थियो।'
न्यायाधीशले भने उनको दोष वा निर्दोषबारे निर्णय गर्न समय र प्रक्रिया तोकिने स्पष्ट पार्दै बयान छोट्याएका थिए।
करिब ४० मिनेट चलेको सुनुवाइका क्रममा मादुरो र उनकी श्रीमती सिलिया फ्लोरेसले आफूहरूमाथि लगाइएका लागूऔषध र हतियारसम्बन्धी सबै आरोप अस्वीकार गरे। 'म निर्दोष छु। म सभ्य व्यक्ति हुँ,' मादुरोले अदालतमा भने। फ्लोरेसले पनि आफू 'पूर्ण रूपमा निर्दोष'रहेको बताइन्।
६३ वर्षीय मादुरो र उनकी श्रीमतीलाई अमेरिकी सेनाले शनिबार भेनेजुएलामा गरिएको अचानक सैन्य कारबाहीका क्रममा पक्राउ गरेको थियो। उक्त कारबाही रातारात सञ्चालन गरिएको र विभिन्न सैन्य अड्डाहरूमा आक्रमण भएको बताइएको छ। पक्राउपछि दुवैलाई न्यूयोर्कस्थित जेलमा राखिएको छ।
सुनुवाइका क्रममा मादुरो र फ्लोरेस नीलो र सुन्तला रंगको जेल पोशाकमा देखिएका थिए। उनीहरूले स्पेनी अनुवाद सुन्न हेडफोन प्रयोग गरेका थिए। मादुरोले अदालतमा पहेंलो कानुनी प्याडमा नोटहरू लिइरहेको देखिन्थ्यो।
सुनुवाइको अन्त्यतिर दर्शकदीर्घाबाट एक व्यक्तिले मादुरोविरुद्ध नाराबाजी गरेपछि मादुरोले जवाफ दिँदै आफू 'अपहरणमा परेको राष्ट्रपति र युद्धबन्दी' भएको बताएका थिए। त्यसपछि सुरक्षाकर्मीहरूले ती व्यक्तिलाई अदालतबाट बाहिर निकालेका थिए।
अमेरिकी सैन्य आक्रमणका क्रममा काराकासस्थित मादुरोको पारिवारिक घरमा समेत क्षति पुगेको जनाइएको छ। मादुरोकी श्रीमती फ्लोरेसको आँखाको वरिपरि चोटपटक देखिएको छ। जुन गिरफ्तारीका क्रममा लागेको उनका वकिलहरूले बताएका छन्। वकिलहरूले अदालतसँग उचित स्वास्थ्य सुविधा उपलब्ध गराउन माग गरेका छन्।
अमेरिकाले मादुरोमाथि लागूऔषध–आतंकवादको षड्यन्त्र, कोकेन आयात गर्ने षड्यन्त्र तथा मेसिनगन र विनाशकारी हतियार राख्ने आरोप लगाएको छ। यस मुद्दामा मादुरोकी श्रीमती,छोरा र अन्य व्यक्तिहरूलाई समेत प्रतिवादी बनाइएको छ। अदालतले मुद्दाको अर्को सुनुवाइ मार्च १७ मा तय गरेको छ।
