— एमाले अध्यक्ष केपी शर्मा ओलीले एकै पटक प्रतिनिधिसभा सदस्य निर्वाचन हुनेमा आशंका व्यक्त गरेका छन्। मंगलबार पार्टी केन्द्रीय कार्यालय च्यासलमा बसेको पार्टी केन्द्रीय सचिवालय बैठकमा ओलीले यस्तो बताएका हुन्।
अध्यक्ष ओलीको भनाइ उद्धृत गर्दै नेकपा एमालेका उपमहासचिव लेखराज भट्टले निर्वाचनमा कसरी जाने भन्नेबारे नेतृत्वबीच छलफल भइरहेको बताए। उनले अध्यक्ष ओलीले बाह्य रूपमा निर्वाचनको माहोल बनेको र त्यसअनुसार तयारी गर्न नेता–कार्यकर्तालाई निर्देशन दिएको पनि बताए। भट्टका अनुसार ओलीले आगामी निर्वाचनलाई आन्दोलनकै रूपमा लिनुपर्ने बताएका थिए।
ओलीले सरकारको गतिविधि र देशमा भइरहेको साम्प्रदायिक घटनाले निर्वाचन हुन्छ कि हुँदैन भन्ने अन्योलता सिर्जना गरेको पनि बैठकमा बताएका थिए। भट्टले भने, ‘चुनावमा कसरी जाने, के गर्ने भन्ने कुरा नेतृत्वबीच छलफल हुनु स्वाभाविक नै हो। बाह्य रूपमा वातावरण बनेको जस्तो छ, त्यसको तयारी हामीले गर्नुपर्छ।’
ओलीले निर्वाचन हुन्छ कि हुँदैन भन्नेमा अन्योल रहेको भन्दै चुनाव एकै पटक नभई खण्ड–खण्डमा हुन सक्ने र यसबारे मनोवैज्ञानिक रूपमा तयार रहन निर्देशन दिएको पनि भट्टले बताए।
सचिवालय बैठकमा ओलीले एमाले र कांग्रेस नजिकिँदै गएपछि सरकार र केही विदेशी शक्तिहरू आफैं निर्वाचनलाई सार्ने वा विभिन्न चरणमा विभाजन गरेर गराउने षड्यन्त्र गरिरहेको दाबी पनि सुनाएका थिए। तर यस्तो षड्यन्त्र ठ्याक्कै कसले र कसरी गरिरहेको छ भन्नेबारे भने केही खुलाएनन्।
एमालेले चुनावमा भाग लिनका लागि समानुपातिक उम्मेदवारहरूको बन्दसूची बुझाइसकेको छ। यद्यपि ओलीले सार्वजनिक रूपमा भने चुनाव नहुने शंका दोहोर्याइरहेका छन्। १५ पुसमा राजधानीमा आयोजित पार्टीको कार्यक्रममा पनि ओलीले चुनावको वातावरण नबनेको र नेताहरूलाई लखेट्ने काम भइरहेको बताएका थिए। उनले भनेका थिए, ‘चुनावमा एमाले–कांग्रेसबाहेकले सरकार बनाउँछ? सम्भव यो कुरा हो? यस्तो कुरा पत्याएर प्रधानमन्त्री हुन लाग्ने?’
ओलीले राजनीतिक अभिव्यक्तिमा चुनावबारे बदलिदो दृष्टिकोण सार्वजनिक गरिरहेपनि एमाले चुनावमा होमीइसकेको देखिन्छ । आइतबार मात्रै आयोगले गुन्डुस्थित ओली निवासमै पुगेर उनको बयान लिएलगत्तै उनको स्थानहद फुकुवा भइसकेको छ ।
एमालेले अध्यक्ष ओलीलाई लगाएको स्थानहद र पासपोर्ट रोक्का फुकुवा हुनबित्तिकै चुनावी अभियानलाई तीव्रता दिने आन्तरिक तयारी गरेको थियो । त्यसअघि एमालेले संसद पुन:स्थापनालाई पहिलो र निर्वाचनलाई दोस्रो प्राथमिकतामा राखेको थियो ।
एमालेले पुस २६ भित्र प्रत्यक्ष उम्मेदवारको सफारिस गर्न निर्देशन दिइसकेकोछ । पुस २० भित्र जिल्लाको पालिका कमिटीले जिल्लालाई, २४ भित्र जिल्लाले प्रदेश र २५ भित्र प्रदशेले केन्द्रीय कमिटीलाई प्रत्यक्ष उम्मेदवारको सिफारिस गर्न निर्देशन गरिसकेको छ । त्यही निर्देशनअनुसार पालिका कमिटीहरुले सम्भावित उम्मेदवार छान्ने प्रक्रिया तीव्र बनाएका छन् ।
