: ठूलो परिमाणको लागुऔषधसहित दुई जना पक्राउ परेका छन्। इलाका प्रहरी कार्यालय धरानले लागुऔषध नियन्त्रण अभियानअन्तर्गत ठूलो परिमाणको लागुऔषध सहित उनीहरूलाई पक्राउ गरेको डीएसपी भीषणबाबू राईले बताए।
आइतबार बिहान प्रहरी हवलदार खेम बरालको कमाण्डमा खटिएको तीन जनाको गस्ती टोलीले धरान उप–महानगरपालिका–१७ मा कालाबञ्जारबाट धरानतर्फ आउँदै गरेको को १८ प ४२५६ नम्बरको मोटरसाइकललाई रोकी चेकजाँच गरेको थियो। चेकजाँचका क्रममा मोटरसाइकलमा सवार सुनसरीको कोशी गाउँपालिका–१ का १८ वर्षीय जयप्रकाश यादवको साथबाट लागुऔषध ट्रामाडोल ९ हजार ९ सय १० क्याप्सुल फेला परेको डीएसपी राईले बताए।
लागुऔषध बरामद गरेपछी प्रहरीले लागुऔषध सहित जयप्रकाश यादव र मोटरसाइकल चालक सोही स्थानका २३ वर्षीय रोशन झालाई नियन्त्रणमा लिई इलाका प्रहरी कार्यालय धरानको हिरासतमा राखेको छ। बरामद गरिएको लागुऔषध, मोटरसाइकल र दुवै व्यक्तिलाई हिरासतमा राखी थप अनुसन्धान सुरु गरिएको डीएसपी राईले जानकारी दिए।
प्रहरीका अनुसार नेपाल–भारत खुला सिमानाको दुरुपयोग गर्दै तस्करहरूले भारतबाट लागुऔषध खरिद गरी नेपाल भित्र्याउने र पहाडी जिल्लासम्म पुर्याई बिक्री वितरण गर्ने गरेका छन्। पछिल्लो समय सुनसरी, मोरङलगायत तराईका जिल्लालाई ट्रान्जिट प्वाइन्ट बनाएर लागुऔषधको अवैध कारोबार बढ्दै गएको प्रहरीले जनाएको छ।
प्रहरीले दैनिकजसो लागुऔषध कारोबारमा संलग्न व्यक्तिहरूलाई पक्राउ गरिरहेको भए पनि लागुऔषध नियन्त्रण अझै चुनौतीपूर्ण बन्दै गएको छ। विशेषगरी ट्रामाडोल, ब्राउन सुगर र विभिन्न प्रकारका नशालु औषधिहरू युवा पुस्तामाझ सजिलै उपलब्ध हुन थालेपछि समाजमा गम्भीर समस्या देखिन थालेको छ।
लागुऔषधको कुलतमा फस्दै गएका युवाहरूका कारण पारिवारिक, सामाजिक तथा शैक्षिक क्षेत्रमा नकारात्मक प्रभाव परिरहेको छ। यस समस्याको दीर्घकालीन समाधानका लागि सीमा नाकामा कडाइ, निरन्तर प्रहरी निगरानी, समुदाय–प्रहरी सहकार्य तथा युवालाई लक्षित सचेतनामूलक कार्यक्रम आवश्यक रहेको धरान–१५ का कुमार भारतीले बताए।
