— नेपाल महिला ट्वान्टी–२० विश्वकप छनोटको दोस्रो अभ्यास खेलमा अमेरिकासँग ६ विकेटले पराजित भएको छ । नेपालको अभ्यास खेलमा यो लगातार दोस्रो हार हो ।
टस हारेपछि ब्याटिङको निम्तो पाएको नेपालले त्रिवि क्रिकेट अन्तर्राष्ट्रिय मैदानमा निर्धारित २० ओभरमा ९ विकेट गुमाई १ सय ३६ रन बनाएको थियो । अमेरिकाले अन्तिम ओभरमा लक्ष्य पूरा गर्यो ।
आयरल्यान्डसँगको पहिलो अभ्यास खेलमा १ सय रन मात्र बनाउन सकेपछि नेपालले बुधबार ९९ रनको हार बेहोरेको थियो । तर शुक्रबारको खेलमा नेपालको माथिल्लोक्रमले निकै सुधारिएको ब्याटिङ गरेको थियो ।
सम्झना खड्का र विन्दु रावलले नेपालले निकै राम्रो सुरुआत दिलाएका थिए । यी दुईले ६ ओभरभित्र ४२ रन जोडेका थिए । आफ्नै कलमा निकै साँघरो १ रन लिन खोज्दा रनआउट भएकी सम्झनाले २० बल खेलि ३ चौकासहित २४ रन बनाए । उनी ३ रनमै क्याच आउट हुनबाट जोगिएकी थिइन् । उपकप्तान पुजा महतोले १५ बल खेलि २ चौकासहित १७ रन बनाइन् ।
कप्तान इन्दु बर्मा १ चौका प्रहार गरी ५ बलमा ४ रन बनाइन् । विन्दु पनि २७ रनमा रनआउट भइन् । उनले २८ बल खेल्दै ३ चौका प्रहार गरिन् । कविता कुँवर ३, रुविना क्षेत्री ५ रनमा आउट भइन् । कविता जोशी र रोमा थापाले मध्यक्रममा राम्रो ब्याटिङ गर्दै नेपाललाई राम्रो स्थितिमा उभ्याए ।
जोशीले १४ बल खेलि ४ चौकासहित २० रन बनाइन् । रोमाले पनि १४ बल खेल्दै समान १ चौका र छक्कासहित १९ रन बनाइन् । सीता रानामगरले १ रनमात्र बनाउन सकिन् । राजमती ऐरी ७ बल खेली १ चौकासहित ८ र मनीषा उपाध्याय १ रनमा अविजित रहिन् ।
अमेरिकाकी तारानुम चोपराले ३ विकेट लिइन् । उनले ४ ओभरमा २३ रन खर्चेकी थिइन् । सैनाभी रेड्डीले २ ओभरमा २० रन खर्चेर २ तथा गितिका कोडाइल र रितु सिंहले १–१ विकेट लिइन् । अमेरिकाले पहिलो अभ्यास खेलमा स्कटल्यान्डमाथी सनसनी विजय हात पारेको थियो ।
ओपनर चेतना रेड्डीले अर्धशतक बनाएपछि जबाफमा आएको अमेरिकाले ५ बल अगाडि लक्ष्य पुरा गर्यो । रेड्डीले ४६ बल खेली ६ चौका प्रहार गर्दै अविजित ५६ रन बनाईन् । रितु १३ बल खेलि २ चौका प्रहार गरि १९ रनमा अविजित रहिन् ।
ओपनर गाग्री भोग्ले ४ रनमात्र बनाई सोमु विष्टको बलमा इन्दुबाट सान्दार क्याच आउट भइन् । इला क्लारिज १४ बल खेली ३ चौका प्रहार गरि १४ रनमा रनआउट भइन् । इसानी भाघेलाले २० रन बनाइन् । रिया शर्माको बलमा बोल्ड हुन पूर्व उनले २० बल खेलि २ चौका प्रहार गरिन् । कप्तान अदिनीबा चुडासमा १३ रन बनाई रुबिना क्षेत्रीको बलमा आउट भइन् ।
नेपालबाट सोमु विष्ट, रुविना क्षेत्री र रिया शर्माले १–१ विकेट लिए ।
