— पोखरा, विराटनगर, गौतमबुद्ध (भैरहवा), नेपालगन्ज र चन्द्रगढी विमानस्थलमा सन् २०२५ मा सबैभन्दा धेरै यात्रुको आवागमन भएको छ।
नागरिक उड्डयन प्राधिकरणले सन् २०२५ मा नेपालका आन्तरिक विमानस्थलमा यात्रु आवागमन र उडान संख्याका आधारमा जारी गरेको तथ्यांकअनुसार काठमाडौंबाहिर पोखरा विमानस्थल सबैभन्दा बढी यात्रुको आवागमन भएको छ । यहाँ ४ लाख २७हजार ४सय १४ यात्रु आएका थिए भने त्यहाबाट ४ लाख ५९ हजार ३ सय ७० यात्रु बाहिरिएका थिए । उक्त विमानस्थलबाट कुल यात्रु संख्या ८ लाख ८६ हजार ७ सय ८४ पुगेको छ।
सन् २०२५ मा विराटनगर विमानस्थलमा ७ लाख ३५ हजार ५ सय २५, भैरहवास्थित गौतमबुद्धमा ७ लाख २९ हजार ९७, नेपालगन्जमा ५ लाख ३५ हजार ९ सय२० र चन्द्रगढीमा ३ लाख ९५ हजार ३८ यात्रु आवागमन भएको थियो ।
यी पाँच विमानस्थलले देशको आन्तरिक यात्रु चापको ठूलो हिस्सा धानेको देखिन्छ ।
सन् २०२५ मा सबैभन्दा बढी उडान भएका विमानस्थलहरूमा लुक्ला (तेन्जिङ–हिलारी) शीर्षस्थानमा छ । जहाँ ३३ हजार ४ सय २० उडान सञ्चालन भएका थिए। त्यसैगरी पोखरामा २६ हजार ७ सय ८२, नेपालगञ्जमा १३ हजार ४ सय ३४, गौतमबुद्धमा ११ हजार ९ सय ३१ र विराटनगरमा ११ हजार ६सय ९२ वटा उडान भएका थिए ।
दुर्गम क्षेत्रका केही विमानस्थलमा अझै यात्रु र उडान दुवै न्यून छन्। इलाम (सुकिलुम्बा) विमानस्थलमा सन् २०२५ मा १२ उडानमा ८७ यात्रु आवागमव भएको थियो । सुदुरपश्चिमको बझाङमा १४ उडानमा १ सय २७ यात्रु र अछामको साफेबगरमा ८० उडानमा ३ सय ८० यात्रु, रुम्जाटारमा ९८ उडानमा ६सय३८ यात्रु तथा थामखर्कमा ९८ उडानमा ६ सय ३३ यात्रु आवागमन भएको थियो ।
नागरिक उड्डयन प्राधिकरणका सहप्रवक्ता ज्ञानेन्द्र भुलका अनुसार आन्तरिक उडानमा यात्रु संख्या निरन्तर बढिरहेको छ। पोखरा, लुक्ला, भैरहवा, विराटनगर र नेपालगन्ज विमानस्थलमा दुईतर्फी यात्रुको चाप उच्च छ ।
