: क्यानडाका प्रधानमन्त्री मार्क कार्नीले चीनको बेइजिङमा चिनियाँ राष्ट्रपति सी जिनपिङसँग भेटवार्ता गरेका छन्। भेटमा दुई देशबीचको व्यापार सम्झौता र समग्र द्विपक्षीय सम्बन्धका विषयमा छलफल भएको जनाइएको छ।
भेटका क्रममा प्रधानमन्त्री कार्नीले चीन–क्यानडा सम्बन्धलाई थप अगाडि बढाउन दुवै देश मिलेर काम गर्न सक्ने बताएका छन्। उनले भने,'हामी मिलेर दुई देशबीचको सम्बन्धलाई नयाँ उचाइमा पुर्याउन सक्छौं।'
यसैबीच, चिनियाँ राष्ट्रपति सी जिनपिङले पछिल्ला महिनाहरूमा विभिन्न क्षेत्रमा भइरहेको सहकार्यप्रति सन्तोष व्यक्त गर्दै त्यसबाट सकारात्मक परिणाम आएको बताएका छन्। 'चीन–क्यानडा सम्बन्धको स्वस्थ र स्थिर विकास विश्वमा शान्ति, स्थिरता, विकास र समृद्धिका लागि अनुकूल हुन्छ,'सी जिनपिङले भने।
क्यानडा र चीनबीच झन्डै एक दशकदेखि तनावपूर्ण रहँदै आएको सम्बन्धको पृष्ठभूमिमा प्रधानमन्त्री मार्क कार्नीको चीन भ्रमणलाई महत्वपूर्ण रूपमा हेरिएको छ। अधिकारीहरूले यो भ्रमणलाई “महत्वपूर्ण र ऐतिहासिक” भन्दै क्यानडा–चीन सम्बन्धमा नयाँ चरणको सुरुवातका रूपमा व्याख्या गरेका छन्। सन् २०१८ मा हुवावेका एक शीर्ष कार्यकारीको क्यानडामा गिरफ्तारीपछि दुई देशबीचको सम्बन्ध न्यून बिन्दुमा पुगेको थियो।
प्रधानमन्त्री कार्नी बुधबार साँझ चीन पुगेका थिए। उनले त्यसको भोलिपल्ट चिनियाँ प्रधानमन्त्री ली केकियाङसँग भेटवार्ता गरेका छन्।
चीनको यो भ्रमण क्यानडाका लागि द्विपक्षीय सम्बन्धलाई पुनः सन्तुलनमा ल्याउने र नयाँ आर्थिक अवसरहरू खोज्ने अवसरका रूपमा लिइएको छ। यो पहल क्यानडाले आफ्नो सबैभन्दा ठूलो व्यापारिक साझेदार संयुक्त राज्य अमेरिकामाथिको निर्भरता घटाउने दीर्घकालीन नीतिको एक हिस्सा भएको बताइएको छ।
