: अछाममा निर्वाचन अधिकृतको कार्यालय स्थापना गरिएको छ । फागुन २१ गतेका लागि तोकिएको प्रतिनिधिसभा निर्वाचनका लागि शुक्रबार अछाममा निर्वाचन अधिकृतको कार्यालय स्थापना गरिएको हो ।
मुख्य निर्वाचन अधिकृत तथा प्रतिनिधिसभा निर्वाचन क्षेत्र नं २ को मंगलसेनमा तथा प्रतिनिधिसभा निर्वाचन क्षेत्र नं १ को साँफेबगर शुक्रबार कार्यालय स्थापना गरिएको छ । मंगलसेनमा जिल्ला अदालत तथा साँफेबगर नगरपालिकाको नयाँ भवनमा कार्यालय स्थापना गरिएको छ । अछाममा जिल्ला न्यायाधीश रोशनकुमार भट्टराई मुख्य निर्वाचन अधिकृत र क्षेत्र नं २ को निर्वाच अधिकृत तथा भोलाराज रेग्मीलाई क्षेत्र नं १ को निर्वाचन अधिकृत तोकिएको छ ।
मुख्य निर्वाचन अधिकृत रोशनकुमार भट्ट्राईले फागुन २१ को निर्वाचन सफल, शान्तीपुर्ण र भयरहित वातावरणमा निर्वाचन सम्पन्न गर्नका लागि सबै पक्ष सबै सरोकारवालाहरूको सामूहिक प्रतिवद्धता आवश्यक रहेको बताए ।
निर्वाचन आयोगको कार्यतालिका अनुसार दुवै निर्वाचन क्षेत्रमा कार्यालय स्थापनापछि थप अन्य कार्यहरू अगाडि बढाइने भट्ट्राईले जानकारी दिए । निर्वाचन आयोगले माघ ६ गते उम्मेदवार मनोनयन दर्ता गर्ने कार्यतालिका सार्वजनिक गरेको छ ।
अछामका प्रमुख जिल्ला अधिकारी यज्ञबहादुर बुढाले जिल्लामा १३० वटा निर्वाचन स्थल र २१३ वटा मतदान केन्द्र रहेको जानकारी दिए । उनले निर्वाचनका लागि एकिकृत जिल्ला सुरक्षा योजना तयार पारिएको जानकारी दिए । निर्वाचनका लागि जनशक्ति पदपूर्ति गर्ने क्रममा १हजार६४२ निर्वाचन प्रहरी भर्ना आवेदन खुल्ला गरिएको र आवेदन संख्या अपुग भएकाले माघ ३ गतेसम्म म्याद थप गरिएको जानकारी दिए ।
माघ ६ गते उम्मेदवारको मनोनय दर्ताका लागि र क्रमश: निर्वाचन आयोगको कार्यतालिका अनुसार कामकाजहरू अगाडि बढाउने क्षेत्र नं १ का निर्वाचन अधिकृत भोलाराज रेग्मीले जानकारी दिए ।
