— नेपाली कम्युनिष्ट पार्टीका वरिष्ठ नेता वामदेव गौतमले आइतबार राष्ट्रिय सभा सदस्यबाट राजीनामा दिने भएका छन् ।
बर्दिया क्षेत्र नम्बर १ मा नेकपाबाट प्रतिनिधिसभा सदस्य उम्मेदवार हुने भएपछि उनले राष्ट्रिय सभा सदस्यबाट राजीनामा दिन लागेका हुन् ।
गुलरियामा शनिबार बिहान राष्ट्रियसभा सदस्य भएर प्रतिनिधिसभाको उम्मेदवार हुन नपाउने भएकाले राजीनामा दिन लागेको बताए।
बर्दिया क्षेत्र नम्बर १ बाट २०४८ सालदेखि निरन्तर चुनावी मैदानमा उत्रिएका तत्कालीन एमालेका उपाध्यक्ष वामदेव गौतम कांग्रेसका पूर्वसभापति एंव पूर्वसिँचाई मन्त्री सञ्जयकुमार गौतमसँग ०७४ मा पराजित भएका थिए । त्यसपछि भने उनी यो क्षेत्रबाट उम्मेदवार बनेका छैनन् ।
बर्दिया–१ बाट राजनीति गरिरहेका गौतम ०७४ पछि भने बर्दियामा प्रतिनिधिसभा सदस्यको उम्मेदवार भएका थिएनन्। उनी अहिले पुनः बर्दियाको राजनीतिमा सक्रिय बनेका छन् । नेता गौतम दुई दिनयता बर्दिया–१ का मतदातासँग भेटघाटमा व्यस्त छन्। गौतमले राष्ट्रिय सभाबाट राजीनामा दिन शनिबार काठमाडौं जान लागेको बताए।
बर्दिया–१ को बासगढी र गुलरिया नगरपालिका तथा बढैयाताल गाउँपालिकाका केही ठाउँमा उनले मतदातासित भेटघाट गरेको गौतमका निकट कार्यकर्ता अतिक अहम्मद एराकीले बताए ।
