— नेपाली राजनीतिमा पृथ्वी सुब्बा गुरुङ नौलो नाम होइन । लमजुङको क्व्होलासोथार गाउँपालिका- ९, गिलुङ टक्सार घर भइ हाल नेकपा (एमाले) उपाध्यक्ष रहेका उनी नवौंपटक चुनाव लड्दैछन् ।
संघीयतापछि प्रतिनिधि सभा सदस्यका लागि एउटामात्र निर्वाचन क्षेत्र कायम भएको लमजुङमा उनी दोस्रोपटक चुनावी मैदानमा उत्रिन लागेका हुन् । नेकपा एमाले केन्द्रीय सदस्य जमीन्द्रमान घलेले दाबी रहे पनि आफू सम्मिलित पार्टी सचिवालय बैठकले फागुन २१ गते हुने भनिएको प्रतिनिधि सभा सदस्य निर्वाचनमा अन्ततः पृथ्वी सुब्बा गुरुङलाई उम्मेदवार बनाउने निर्णय गरिसकेको छ ।
पार्टीले पृथ्वी सुब्बा गुरुङलाई उम्मेदवार बनाउने निर्णय गरेसँगै सामाजिक सञ्जाल तातेको छ । लमजुङबाट हालसम्म यतिका ‘हेभीवेट’ नेता अरू नभएकाले उनैलाई विजयी गराउनुपर्ने एकाथरीको तर्क छ । अर्को थरीको तर्क भने सामाजिक सञ्जाल बन्द गराउनेलाई भोट दिन नहुने र नयाँलाई दिनुपर्ने तर्क अघि सारेका छन् ।
२०७९ को चुनावमा घले प्रतिनिधि सभा सदस्य र गुरुङ प्रदेश सभा सदस्यका लागि चुनाव उठ्ने गरी अघि बढे पनि पार्टीले गुरुङलाई प्रतिनिधि सभा सदस्य र घलेलाई प्रदेश सभा सदस्यका लागि टिकट दियो । तत्कालीन सत्ता गठबन्धन कांग्रेस–माओवादी केन्द्रका उम्मेदवार नेपाली कांग्रेसका टकराज गुरुङले प्रदेश (१) मा चुनाव जित्दा घले पराजित भए । तत्कालीन सत्ता गठबन्धनका उम्मेदवार तत्कालीन माओवादी केन्द्रका महासचिव देवप्रसाद गुरुङलाई हराउँदै पृथ्वी सुब्बा गुरुङ निर्वाचित भए ।
२०४३ सालबाट हरेक संसदीय निर्वाचनमा उम्मेदवार पृथ्वीसुब्बाले २०७९ को चुनावमा देवप्रसाद गुरुङलाई ३ हजार १ सय ८८ मतले पराजित गर्दै प्रतिनिधि सभा सदस्य बने । पृथ्वीसुब्बाले ३४ हजार ९ सय ६९ मत ल्याउँदा देवप्रसादले ३१ हजार ७ सय ८१ मत ल्याएका थिए । कूल १ लाख ३३ हजार ५ सय ५९ मतदाता रहेकामा ८० हजार १ सय ९२ मत खसेको थियो । खसेको मतमध्ये २ हजार ३ सय ८४ मत बदर भएको थियो ।
पृथ्वी सुब्बा गुरुङ २०४३ सालदेखि हरेक संसदीय निर्वाचनमा उम्मेदवार बन्दै आएका छन् । २०४८, २०५१, २०५६, २०६४, २०७०, २०७४, २०७९ मा उनी उम्मेदवार थिए । यसअघि ८ पटक चुनाव लडेका पृथ्वी सुब्बा गुरुङ २०६४, २०७४ र २०७९ मा मात्रै गरी ३ पटक निर्वाचित भए । बाँकी ५ पटक हारे ।
अमृत साइन्स क्याम्पसमा २०३४ मा बीएससी अध्ययन सकेर आफ्नै गाउँ हाल क्व्होलासोंथर गाउँपालिका-९, गिलुङमा रहेको हालको बुद्धोदय माविमा उनी शिक्षक बने । विज्ञानका शिक्षक करिब ७ बर्ष प्रधानाध्यापकमा रहँदै गर्दा राजिनामा दिएर २०४३ मै जनपीक्षय उम्मेदवार बने । ‘एक वाम–एक ठाम’ नारा दिएर चुनाव लड्दा राष्ट्रिय पञ्चायत सदस्यमा लेखनाथ अधिकारीसँग उनी हारेका थिए ।
२०४८ मा उनी कांग्रेसका रामबहादुर गुरुङसँग पराजित भए । २०५१ मा उनी पुनः उनै रामबहादुरसँग हारे । २०५६ मा कांग्रेसका हरिभक्त अधिकारीसँग हारे । एमाले तेस्रो पार्टीमा खुम्चिँदा २०६४ को पहिलो संविधान सभा सदस्य निर्वाचनमा कांग्रेसका दिलबहादुर घर्तीलाई हराउँदै उनी निर्वाचित भए । २०६५ देखि २०६९ सम्म आदिवासी जनजाति सभासदको समूह ककसको संयोजक बनेका उनी खसआर्य समुदायमाझ विवादित बनाइँदा २०७० को दोस्रो संविधान सभा चुनावमा कांग्रेसका चन्द्रबहादुर कुँवरसँग ६७२ मतले पराजित भए ।
२०७४ को प्रतिनिधि सभा तथा प्रदेश सभा सदस्य निर्वाचनमा पृथ्वीसुब्बा लमजुङ प्रदेश (ख) बाट निर्वाचित हुँदै गण्डकी प्रदेशको पहिलो मुख्यमन्त्री बने । तत्कालीन नेकपामा आएको खटपटपछि तत्कालीन माओवादी केन्द्र समर्थित सांसदहरूले समर्थन फिर्ता लिँदा उनी २०७८ जेठ २७ गते पदमुक्त भए । मुख्यमन्त्री हुँदा उनले प्रदेश संरचनालाई बलियो बनाउन गण्डकी विश्वविद्यालय स्थापना गरे । एक घर एक धारको अभियान चलाएर घरघरै धारा पुर्याए । हरेक पालिका केन्द्रसम्म पक्की सडकको योजना अघि सारे । उज्ज्यालो प्रदेशको परिकल्पना गरे । मुख्यमन्त्रीहरूलाई भेला गरेर केन्द्रीय एकीकृत अधिकारबारे धावा बोले । संवैधानिक अधिकार मागे ।
२०७९ को निर्वाचनमा विजयी उनी २०८१ असार ३१ गते सञ्चार तथा सूचना प्रविधिमन्त्रीमा चुनिए । सत्तामा रहेको १५ महिना नबित्दै गत भदौ २३ को जेन्जी आन्दोलनपछि एमाले नेतृत्वको सरकार ढल्यो । सामाजिक सञ्जाल बन्द गराएको र रुखो अभिव्यक्ति दिएको भन्दै उनी आलोचित भए । एमाले र उनले सामाजिक सञ्जाललाई बन्द नभइ सेवा प्रदायकले नेपालको संविधान मानेर व्यवसाय सञ्चालन गर्न आग्रह गर्दा अटेरी गरेपछि परिणाम भन्दै आएको छ । जेन्जी आन्दोलनमा घुसपैठ हुँदा घटना घटेको एमाले र उनको तर्क छ ।
संघीयता पक्षधर पृथ्वी सुब्बा गुरुङ पार्टीभित्र बैचारिक नेतामा गनिन्छन् । पार्टीको १० औं राष्ट्रिय महाधिवेशनबाट उपमहासचिवमा निर्वाचित उनी ११ औं राष्ट्रिय महाधिवेशनबाट सर्वाधिक मतसहित उपाध्यक्षमा निर्वाचित भएका छन् । नागरिकता अनुसार २०१४ फागुन २ गते जन्मिएका ६८ वर्षीय पृथ्वी सुब्बा गुरुङले आफ्नो जितलाई निरन्तरता दिन सक्छन् या सक्दैनन्, त्यो भने हेर्न बाँकी छ ।
