— अमेरिकी राष्ट्रपति डोनाल्ड ट्रम्पले भन्सार शुल्क बढाउने धम्की दिएपछि आठवटा युरोपेली देशले विरोध गरेका छन् ।
यसअघि ग्रिनल्यान्ड गाभ्ने आफ्नो योजनामा असहमत हुने देशहरुमाथि भन्सार शुल्क बढाइने चेतावनी उनले दिएका थिए ।
ट्रम्पले डेनमार्क, नर्वे, स्विडेन, फ्रान्स, जर्मनी, बेलायत, नेदरल्यान्डस् र फिनल्यान्डमाथि १ फेब्रुअरीदेखि भन्सार शुल्क १० प्रतिशतले बढाउने बताइसकेका छन् । उनले यो शुल्क २५ प्रतिशतले बढ्नसक्ने चेतावनी पनि दिएका छन् ।
फ्रान्स्का राष्ट्रपति इममानुयल माक्रोनले यस कदम ‘अस्विकार्य’ रहेको बताए । त्यसैगरी बेलायतका प्रधानमन्त्री कैर स्टार्मरले यस कदम पूर्णत गलत रहेको प्रतिक्रिया दिए ।
यसैबीच डेनमार्क र ग्रिनल्यान्डमा हजारौं मानिसहरुले शनिबार प्रदर्शन गरेका छन् । ट्रम्पले ग्रिनल्यान्डलाई अमेरिकामा गाभ्ने योजना अघि सारेपछि त्यसको विरोधमा प्रदर्शन भएको हो ।
आर्कटिक महासागर र उत्तरी एटलान्टिक महासागरले घेरिएको ग्रिनल्यान्ड भूरणनीतिक तथा स्रोत—साधनको महत्वका हिसाबले पवनि महत्वपूर्ण मानिन्छ ।
आर्कटिक क्षेत्रको बरफ पग्लदैं जाँदा एशिया, युरोप, अफ्रिका र अमेरिका जोड्ने महत्वपूर्ण समुद्री नाकाका रुपमा यो क्षेत्र विकास हुनसक्छ । त्यहीकारण यस क्षेत्रमा भूराजनीतिक प्रतिस्पर्धा बढिरहेको छ ।
रुस र चीनले यहाँ आफ्नो प्रभाव बढाएको भन्दै अमेरिकी राष्ट्रपति डोनाल्ड ट्रम्पले यस क्षेत्रलाई अमेरिकाको हिस्सा बनाउन चाहेका छन् । त्यसका लागि कुटनीतिक माध्यमबाट प्रयास गर्ने र संभव नभएर सैन्य हस्तक्षेप गरेर भएपनि ग्रिनल्यान्ड लिने उनको योजना छ ।
ग्रिनल्यान्ड विगत ३ सय वर्षदेखि डेनमार्कको हिस्सा रहदैं आएको छ । यस स्वशासित टापुसँग स्वतन्त्रता माग गर्नसक्ने आत्मनिर्णयको अधिकार पनि छ । तर, अधिकांश नागरिक अमेरिकामा मिसिने निर्णयको विरोधमा देखिएका छन् । ग्रिनल्यान्डको जनसंख्या ५६ हजार हाराहारीमा छ ।
