— आगामी फागुन २१ मा हुने प्रतिनिधिसभा सदस्यको निर्वाचनका लागि निर्वाचन प्रहरीमा भर्ना हुन आवेदन दिएका परीक्षार्थीको हेटौंडामा बिहीबार लिखित परीक्षा सम्पन्न भएको छ ।
निर्वाचन प्रहरीका लागि आवेदन दिएकामध्ये प्रारम्भिक स्वास्थ्य परीक्षण र शारीरिक परीक्षणमा उत्तीर्ण भएकाहरूको लिखित परीक्षा लिइएको हो । हेटौंडा उपमहानगरपालिका–११ थानाभर्याङस्थित प्रदेश प्रहरी कार्यालय हेटौंडाको खुला मैदानमा लिखित परीक्षा लिइएको हो ।
लिखित परीक्षामा २ हजार १ सय ५० जना सहभागी थिए । लिखित परीक्षामा उत्तीर्ण हुनेहरूलाई अन्तर्वार्ता लिएर निर्वाचन प्रहरीमा भर्ना गरिने जिल्ला प्रहरी कार्यालय मकवानपुरका प्रहरी नायब उपरिक्षक पुष्कर बोगटीले बताए । अन्तर्वार्तामा उत्तीर्ण भएकाहरूलाई तत्कालै आधारभूत तालिम दिइने उनले सुनाए ।
जिल्ला प्रहरी कार्यालय मकवानपुर र सशस्त्र प्रहरी वल १४ नम्बर गण हेटौंडालाई गरेर २ हजार १ सय ३२ जना निर्वाचन प्रहरी भर्ना गरिनेछ । सशस्त्र प्रहरी बल १४ नम्बर गण हेटौंडाका निम्ति १ सय ७९ जना र जिल्ला प्रहरी कार्यालय मकवानपुरका निम्ति १ हजार ९ सय २३ जना निर्वाचन प्रहरी भर्ना गर्ने जनाएको छ ।
भर्ना गरिने कुल संख्यामध्ये कम्तीमा ३३ प्रतिशत महिला रहने जिल्ला प्रहरी कार्यालय मकवानपुरले जनाएको छ ।
