— दाङ सहयोगापेक्षी सडक मानवमुक्त घोषणा भएको छ। सडकमा अलपत्र मानिसहरुलाई आश्रम तथा परिवारमा पुनर्मिलन गराएर बुधबार दाङलाई सडक आश्रित मानवमुक्त जिल्ला घोषणा गरिएको हो ।
घोराहीमा कार्यक्रम आयोजना गरी जिल्ला समन्वय समिति प्रमुख नित्यानन्द शर्माले दाङलाई सडकमा आश्रित मानवमुक्त जिल्ला घोषणा गरेका छन्।
सम्मानपूर्वक बाँच्न पाउने मौलिक अधिकारको कार्यान्वयन गर्न स्थानीय सरकार रसामाजिक संघसंस्थाहरुको सहकार्यमा दाङलाई सहयोगापेक्षी सडक मानवमुक्त घोषणा गरिएको उनले बताए।
कार्यक्रममा लुम्बिनी प्रदेशसभा सदस्य लोका विश्वकर्माले सरोकारवालाहरुलाई मानवताप्रति प्रतिबद्ध हुने शपथग्रहण गराएकी थिइन्। बेवारिसे अवस्थामा भेटिने मानिसलाई मानव सेवा आश्रममा संरक्षण गर्न थालिएको छ।
दाङको घोराही उपमहानगरपालिका, तुलसीपुर उपमहानगरपालिका, लमही नगरपालिका,राप्ती गाउँपालिका, गढवा गाउँपालिका, राजपुर गाउँपालिका, बंगलाचुली गाउँपालिका, शान्तिनगर गाउँपालिका, दंगीशरण गाउँपालिका र बबई गाउँपालिकाले अभियान सफल बनाएर सडक मानवमुक्त घोषणा गरेका हुन् ।
यस अभियानमा जोडिएर नीलसागर मानव सेवा आश्रम देउखुरी, मानव कल्याण सेवा समाज नारायणपुर र मानव सेवा आश्रम तुलसीपुरले सडक मानवहरुको उद्धार तथा पारिवारिक पुनर्मिलन गराउने काम गरिरहेका छन् ।
