— युएईको अबुधावीमा रुस, युक्रेन र अमेरिकाबीचको त्रिपक्षीय बैठक सम्पन्न भएको छ । रुसको सरकारी समाचार एजेन्सी तासले अज्ञात स्रोतको हवाला दिदैं ‘केही परिणाम प्राप्त भएको’ जनाएको छ ।
केही समयपछि युएईमा फेरि बैठक बस्नसक्ने रुसी सञ्चारमाध्यम आरटीले जनाएको छ । युक्रेनी अधिकारीहरुले पनि यस वार्ता सकारात्मक रहेको बताएका छन् । युक्रेनका राष्ट्रपति भोलोदमेर जेलेन्स्कीले अर्को साता फेरि बैठक बस्नसक्ने संकेत गरेका छन् । वार्तामा संलग्न अमेरिकी अधिकारीहरूले १ फेब्रुअरीमा नयाँ बैठक हुने बताएका छन् ।
युएईमा वार्ता चलिरहदाँ रूस र युक्रेन एकअर्कासँग युद्ध मैदानमै थिए । युक्रेनले आफ्न उर्जा पूर्वाधार तथा भौतिक सम्पत्तिमा रूसले ड्रोन तथा मिसाइल आक्रमण गरेको र यस क्रममा एकको मृत्यु तथा ३५ घाइते भएको जनाएको छ । त्यस्तै युक्रेनले एम्बुलेन्समाथि आक्रमण गर्दा तीनजना स्वास्थ्यकर्मीको मृत्यु भएको रूसले जनाएको छ ।
फेब्रुअरी २०२२ मा रुसले युक्रेनमाथि आक्रमण गरेयता रुस–युक्रेन र अमेरिकाका प्रतिनिधिबीच छलफल भएको यो पहिलोपटक हो ।
युक्रेनले राष्ट्रिय सुरक्षा परिषद्का प्रमुख रुस्तेम उमरोभ, जनरल स्टाफ प्रमुख एन्ड्री हृनाटोभ र राष्ट्रपति कार्यालयका प्रमुख किरिलो बुडानोभलाई वार्ता टोलीमा समावेश गरेको थियो ।
त्यसैगरी, रुसी टोलीमा राष्ट्रपति भ्लादिमिर पुटिनका सल्लाहकार युरी उसाकोभ, सैन्य अधिकारी एडमिरल इगोर कोस्ट्युकोभसहित उच्चपदस्थ सुरक्षा अधिकारी सहभागी थिए । अमेरिकाबाट राष्ट्रपति डोनाल्ड ट्रम्पका दूत स्टेभेन विटकफ, ट्रम्पका ज्वाइँरसल्लाहकार जारेड कुशनरसहितको टोलीलाई सहभागि थियो ।
अन्य धेरै विषयमा सहमति बनेपनि विशेषगरी सीमा क्षेत्रको विवाद दुई देशबीच पेचिलो मुद्दा बनेको छ । रुसले युद्धपछि बनेको नयाँ सीमा र नयाँ यथार्थ स्विकार्दै युक्रेनी सेना डोन्बस क्षेत्रबाट हट्नुपर्ने माग राखेको छ । तर युक्रेनले आफ्नो भूभाग सुम्पन नसक्ने बताउँदै आएको छ ।
डोन्बस क्षेत्रका दुई प्रान्तमध्ये लुहान्स्को ९७ प्रतिशतभन्दा धेरै भूभाग रूसको नियन्त्रणमा छ । त्यस्तै, डोनेट्स्कको ७० प्रतिशत भूभाग रूसी नियन्त्रणमा छ ।
त्यसैगरी युक्रेनले नाटोको सदस्यता कहिल्यै नलिने प्रतिबद्धता व्यक्त गर्नुपर्ने रूसको शर्त छ । युक्रेनले भने भविष्यमा आक्रमण नहुने ग्यारेन्टीको लागि अमेरिका र पश्चिमा देशहरुबाट सुरक्षा प्रतिबद्धता तथा साथ खोजेको छ ।
