— गुल्मीमा अटो तथा विद्युतीय रिक्साको भाडादर तथा रुट निर्धारण गरिएको छ। तम्घास आसपासमम अटोहरूले भाडा महंगो लिनेगरेको गुनासो आएपछि रेसुंगा नगरपालिकाले भाडादर निर्धारण गरेको हो ।
तम्घास बजार क्षेत्र अन्तर्गत (पूर्वतर्फ टुनिखोला, खानिगाउँ, पश्चिमतर्फ भुझेलखर्क, आदर्श चोक, उत्तरतर्फ बाखेछेडा, धागिथुम, उदिनढुङ्गा बेरियल र दक्षिणतर्फ उपल्लो तम्घास देउराली) भित्र प्रतिव्यक्ति ५० रुपैयाँ र रिजर्भ भएमा १०० रुपैयाँ तोकिएको नगरपालिकाका राजस्व शाखा प्रमुख सुरेश खनालले जानकारी दिए।
उनका अनुसार ताेकिएका स्थानबाहेक कच्ची सडकमा प्रतिकिलोमिटर ८० रुपैयाँ र पक्की सडकमा ५० रुपैयाँ ताेकिएकाे छ ।
ताेकिएकाे समयमा रातिकाे समयमा भने प्रति व्यक्ति १०० रुपैयाँ र रिजर्भ भएमा २०० रुपैयाँ ताेकिएकाे खनालले बताए । साथै नगरपालिकाले भाडादर तथा रुट निर्धारण गर्दै एक जना व्यक्तिलाई पनि ताेकिएकाे दररेटमा सेवा दिनुपर्ने जनाएको छ ।
रेसुंगा नगरपालिकाका प्रमुख प्रशासकीय अधिकृत बाबुराम पल्लीले नगरभित्र यातायात व्यवस्थापनमा सहजता, बजार व्यवस्थापन, स्थानीय यातायात सुरक्षा र नियमन गर्नका लागि नगरपालिकाले 'रेसुंगा नगरपालिकाकाे अटाे तथा विद्युतीय रिक्सा संचालन, व्यवस्थापन र नियमन सम्बन्धि कार्यविधि तयार गरेको बताए । उक्त कार्यविधि अनुसार नगरपालिकाभित्र चल्ने अटाे तथा विद्युतीय रिक्साका लागि भाडादर ताेकिएकाे बताए ।
भाडादर सम्बन्धी पटकपटक गुनासो आएपछि नगरपालिकाले सम्बाेधनका लागि भाडादर निर्धारण गरेको रेसुंगा नगरपालिका प्रमुख खिलध्वज पन्थीले बताए । उनले निर्धारण गरिएको भाडादरले सेवाप्रदायक र सेवाग्राही दुवैलाई फाइदा पुग्ने बताए ।
